Böyük Britaniyanın Kent qraflığında yerləşən, tarixi min ildən çox əvvələ gedib çıxan Allinqton qalası satışa çıxarılıb. İngiltərə kralı VIII Henrinin həyat yoldaşı Anna Boleynlə birlikdə burada nahar etdiyi rəvayət edilən tarixi mülk üçün 5 milyon funt sterlinq, yəni 6,6 milyon dollardan çox vəsait tələb olunur.

HİT.az xəbər verir ki, bu barədə “Daily Mail” nəşri məlumat yayıb.

Meydstoun şəhərində yerləşən qala Medvey çayı boyunca uzanan 42 akr meşəlik ərazi ilə əhatə olunub. Tikili haqqında 1086-cı ildə tərtib edilmiş “Qiyamət günü kitabı”nda da məlumat verilib. Sonralar qala dəbdəbəli iqamətgaha çevrilib. Burada su ilə dolu xəndək, cəngavər turnirləri üçün meydança, ayı döyüşlərinin keçirildiyi arena, böyük zal, daxili həyətlər və yeraltı mağaralar var.

Qalada 30 yataq otağı və qapalı hovuz var

Mülk ümumilikdə 30 yataq otağından ibarətdir. Ərazidə tennis kortu, istixana, qapalı hovuz və xidmət personalı üçün ayrıca otaqlar da mövcuddur.

I kateqoriyalı memarlıq abidəsi statusuna malik qala toy mərasimləri və digər tədbirlər üçün də istifadə edilə bilər. Burada eyni vaxtda 150 nəfərədək qonaq qəbul etmək mümkündür.

Daşınmaz əmlak agentliyi “Knight Frank”ın elanında qalanın ətrafındakı dekorativ fəvvarələri, səliqəli çiçək bağlarını və tozlandırıcı həşəratları cəlb edən çəmənlikləri də xüsusi qeyd olunur. Ərazidə İngiltərənin ən qədim göyərçin evlərindən biri hesab edilən tarixi tikili, həmçinin qalanın qüllələrində yuva quran qızılquşlar var.

Yeni sahib meyvə-tərəvəz bağını da bərpa edə bilər. Mülkün ərazisində fındıq, alma, armud və gavalı ağacları yetişir.

Qala filmlərin çəkiliş məkanı olub

Allinqton qalası 2025-ci ilə qədər ötən il vəfat edən ictimai rəy sorğuları üzrə mütəxəssis ser Robert Vusterə məxsus olub. Onun ölümündən sonra tarixi mülk satışa çıxarılıb.

BBC-nin məlumatına görə, qala kino və televiziya layihələrinin çəkilişlərində də istifadə edilib. Burada “Horrible Histories” serialı və “The Avengers” filmi üçün səhnələr lentə alınıb.

“Knight Frank”ın nümayəndəsi Oli Striter bildirib ki, bu əmlak İngiltərə tarixinin mühüm bir hissəsinin qoruyucusuna çevrilmək üçün nadir fürsətdir. Onun sözlərinə görə, VIII Henrinin qalada qalması və kral otağından istifadə etməsi mülkün tarixi əhəmiyyətini daha da artırır.

Qalanın gələcək sahibi buranı şəxsi iqamətgah kimi istifadə edə, yaxud otelçilik və tədbirlərin təşkili sahəsində kommersiya layihəsinə çevirə bilər. Mülkün M20 avtomobil yoluna yaxın yerləşməsi də onun nəqliyyat baxımından əlverişli olmasını təmin edir.

Samir