Özünə hörmət edən insanlar münasibətlərdə sərhədlərini qoruyur, başqalarının davranışlarına görə öz dəyərlərini şübhə altına almır və mənfi təsirlərdən uzaqlaşmağı bacarırlar. Onlar üçün əsas məqsəd hər kəsin rəğbətini qazanmaq deyil, öz prinsiplərinə uyğun yaşamaqdır.

HİT.az xəbər verir ki, “Your Tango” özünə dəyər verən insanların gündəlik həyatında diqqət çəkən yeddi davranışı açıqlayıb.

1. Başqalarının arxasınca düşmürlər

Özünə inamı yüksək olan insanlar onları incidən və ya dəyər verməyən şəxslərdən üzr istəmək üçün yalvarmır, diqqət qazanmağa çalışmırlar. Bunun əvəzinə özlərinə vaxt ayırır və qarşı tərəfin sözlərindən çox, davranışlarına diqqət yetirirlər. Başqasının onları qəbul etməməsini özlərinin dəyərsiz olması ilə əlaqələndirmirlər.

2. Şəxsi sərhədlərini müəyyənləşdirirlər

Belə insanlar hansı davranışları qəbul edib-etməyəcəklərini bilirlər. Münasibətlərin onlara zərər verdiyini gördükdə məsafə saxlamaqdan çəkinmirlər. Bu yanaşma onları zərərli münasibətlərdən və emosional gərginlikdən qorumağa kömək edir.

3. Keçmiş incikliklərdən uzaqlaşmağı bacarırlar

Özünə hörmət edən insanlar hər mübahisəni sonadək davam etdirməyə və hər kəsdən izahat almağa çalışmırlar. Onlar bağışlamağı və yaşananları geridə qoyaraq həyatlarına davam etməyi bacarırlar. Bu, baş verənləri unutmaqdan çox, incikliyin gündəlik həyatlarına təsirini azaltmaq deməkdir.

4. Mənfi münasibətlərdən uzaq dururlar

Onları emosional baxımdan yoran insanlardan və mənfi söhbətlərdən uzaqlaşmaq hər zaman asan olmasa da, özünə dəyər verən insanlar bunu bacarırlar. Onlar başqalarını razı salmaq naminə öz rahatlıqlarını və xoşbəxtliklərini qurban vermək istəmirlər.

5. Sözlərdən çox davranışlara inanırlar

Bu insanlar verilən vədləri və üzrxahlıqları deyil, real davranışları əsas götürürlər. Qarşı tərəf sevgidən, qayğıdan və dəstəkdən danışsa da, əməlləri bunun əksini göstərirsə, həmin sözləri bəhanə kimi qəbul etmirlər.

6. Tək qalmaqdan qorxmurlar

Özünə hörmət edən insanlar tək vaxt keçirməyi mənfi hal kimi görmürlər. Bu zamanı düşünmək, özlərini daha yaxşı tanımaq və daxili rahatlıqlarını qorumaq üçün dəyərləndirirlər. Daim diqqətlərini yayındırmağa ehtiyac duymur, özləri ilə baş-başa qalmaqdan qaçmırlar.

7. Öz prinsiplərinə sadiq qalırlar

Başqaları tərəfindən qəbul olunmaq və bəyənilmək naminə şəxsi dəyərlərindən imtina etmirlər. Özünə hörmət edən insanlar münasibətlərini qorumaq üçün ehtiyaclarını və mənəvi prinsiplərini arxa plana keçirməyin uzunmüddətli nəticələrini nəzərə alırlar.

Nəşrin yazdığına görə, bu davranışlar insanın özünə münasibəti və başqaları ilə ünsiyyəti baxımından əhəmiyyət daşıyır. Bununla belə, özünə hörmət hər kəsdən uzaqlaşmaq və ya heç vaxt güzəştə getməmək demək deyil. Əsas məsələ sağlam münasibətlərlə şəxsi sərhədlər arasında tarazlıq yaratmaqdır.

Samir