Nəsil Z nümayəndələri şəxsi həyatlarında uğur qazanmaq üçün astrologiya, Tarot, manifestasiya və digər mistik praktikalarla daha çox maraqlanmağa başlayıblar.

HİT.az xəbər verir ki, CNBC-nin DatingNews sorğusuna istinadən yaydığı məlumata görə, 18-60 yaş arası 1013 amerikalının iştirak etdiyi araşdırmada Z nəslinin 64 faizinin sevgi axtarışında ən azı bir dəfə mistik üsullardan istifadə etdiyi müəyyənləşib. Bu göstərici milleniallarda 51, X nəslində 25, bumerlərdə isə cəmi 12 faiz təşkil edib.

Münasibətlər üzrə kouç Emi Çanın sözlərinə görə, gənclər arasında xüsusilə astrologiyaya maraq artıb. O bildirib ki, müştəriləri ilə söhbətlər zamanı tez-tez astrologiya və Merkuri retroqradı ilə bağlı mövzular gündəmə gəlir.

Psixoloq Sabrina Romanoff da eyni tendensiyanı müşahidə etdiyini deyib. Onun fikrincə, əvvəllər insanlar mistik praktikalar haqqında daha çox zarafatla danışırdılarsa, indi bu üsullara daha ciddi yanaşırlar.

Mütəxəssislər bunun əsas səbəblərindən birinin qeyri-müəyyənlik olduğunu düşünürlər. İnsan şəxsi həyatında hadisələrin necə inkişaf edəcəyini bilmədikdə və vəziyyətə nəzarət edə bilmədiyini hiss etdikdə astrologiya, fal və digər mistik üsullar ona müəyyənlik illüziyası verə bilər.

Romanoffun fikrincə, bu xüsusilə gələcəklə bağlı çoxsaylı qeyri-müəyyənliklərlə üzləşən Z nəsli üçün aktualdır. Sosial şəbəkələr də bu tendensiyanı gücləndirir. TikTok və Instagram kimi platformalarda astrologiya, Tarot və manifestasiya ilə bağlı məzmunların çox yayılması bu praktikaları gənclərin gündəlik informasiya mühitinin bir hissəsinə çevirir.

Psixoloqlar hesab edirlər ki, mistik praktikaların özü mütləq problem deyil. Əsas məsələ insanın bütün məsuliyyəti taleyin, kainatın və ya sehrin üzərinə atmasıdır. Əgər Tarot və ya başqa ritual insana özünəinam verərək real addım atmağa kömək edirsə, bu, psixoloji stimul rolunu oynaya bilər. Lakin insan heç bir real tədbir görmədən yalnız mistik üsullara güvənirsə, bunun münasibət qurmaq şansını artıracağı gözlənilmir.

Samir