Duyğularını daxilində gizlədən insanlar bu 6 ifadəni tez-tez işlədir

MARAQLI
15:46 / 22.11.2026
56

Bəzi insanlar yaşadıqları narahatlığı, qorxunu və kədəri başqaları ilə bölüşməkdə çətinlik çəkir, problemlərini öz daxilində saxlamağa üstünlük verirlər. Psixoloqların fikrincə, belə şəxslərin gündəlik ünsiyyətdə işlətdiyi bəzi ifadələr onların emosiyalarını gizlətdiyinə işarə edə bilər.

HİT.az xəbər verir ki, bu barədə “Psychologies” jurnalı məlumat yayıb.

Mütəxəssislər emosiyalarını ifadə etməkdə çətinlik çəkən insanların çox vaxt müəyyən söz və ifadələrdən müdafiə mexanizmi kimi istifadə etdiyini bildirirlər. Bu davranış uzun müddət davam etdikdə həm psixoloji sağlamlığa, həm də sosial münasibətlərə mənfi təsir göstərə bilər.

Psixoloqlar belə insanların daha çox işlətdiyi altı ifadəni müəyyənləşdiriblər:

1. “Hər şey qaydasındadır” – İnsan daxili narahatlığını gizlətmək və mövzunu bağlamaq üçün bu ifadədən istifadə edə bilər.

2. “O qədər də ciddi məsələ deyil” – Problemin əslində yaratdığı emosional təsiri kiçiltmək cəhdidir.

3. “Özüm öhdəsindən gələcəyəm” – Başqalarından kömək istəmək istəməyən və çətinliklərini təkbaşına həll etməyə çalışan şəxslərin tez-tez işlətdiyi ifadədir.

4. “Boş ver, hər şey yaxşı olacaq” – Narahatlıq yaradan mövzudan yayınmaq və hissləri müzakirə etməmək üçün işlədilə bilər.

5. “Mənə heç kim lazım deyil” – Bəzən insanın emosional yaxınlıqdan çəkinməsini və köməyə ehtiyacını gizlətməsini əks etdirir.

6. “Sonra baxarıq” – Çətin söhbətləri təxirə salmaq və hazırda hisslərini bölüşməkdən yayınmaq istəyini göstərə bilər.

Məqalədə qeyd olunur ki, emosiyaların davamlı şəkildə basdırılması ilə bağlı davranışlar aleksitimiya adlanan psixoloji xüsusiyyətlə də əlaqəli ola bilər. Aleksitimiya insanın öz emosiyalarını müəyyənləşdirmək, anlamaq və ifadə etməkdə çətinlik çəkməsi ilə xarakterizə olunur.

“Journal of Personality and Social Psychology” jurnalında dərc olunan araşdırmaya görə, emosiyalarını basdırmağa meyilli insanlar hisslərini daha az ifadə edir, daha çox mənfi emosiyalar yaşayır və psixoloji rifah səviyyəsi daha aşağı olur.

Pozitiv psixologiya üzrə mütəxəssis Florens Servan-Şrayber isə insanların əksəriyyətinin onlardan kömək istənilməsini müsbət qarşıladığını vurğulayıb. Onun fikrincə, sağlam sosial münasibətlərin qurulması üçün qarşı tərəfi diqqətlə dinləmək və ehtiyac duyulduqda dəstək göstərmək vacibdir.

Mütəxəssislər bildirirlər ki, sadalanan ifadələrdən istifadə etmək özlüyündə emosional problemlərin göstəricisi deyil. Lakin insanın davamlı olaraq hisslərini gizlətməsi yaxınlarının diqqətini cəlb etməlidir. Bəzən səmimi söhbət və mühakimə etmədən dinləmək insanın uzun müddət daxilində saxladığı duyğuları bölüşməsinə kömək edə bilər.

Samir
 

0