Soyuducudan düzgün istifadə etməklə həm elektrik enerjisinə qənaət etmək, həm də məişət cihazının istismar müddətini uzatmaq mümkündür. Mütəxəssislər bildirirlər ki, buz qatının yaranmasının qarşısını almaq, qapı rezinlərini yoxlamaq və cihazı düzgün yerləşdirmək enerji sərfiyyatını azaltmağa kömək edir.

HİT.az xəbər verir ki, bu barədə Ukraynanın UNIAN nəşri “Infobae” və “Endesa”nın tövsiyələrinə istinadən yazıb.

Soyuducunun yerini düzgün seçin

Soyuducu soba, qaz plitəsi, radiator və birbaşa günəş işığı düşən pəncərədən uzaqda yerləşdirilməlidir. Əks halda, cihazın kompressoru daxildə lazımi temperaturu qorumaq üçün daha çox işləməli olur.

Bundan başqa, soyuducunun arxa hissəsi ilə divar arasında təxminən 10 santimetr məsafə saxlamaq tövsiyə edilir. Bu, havanın dövr etməsinə və cihazın yaratdığı istiliyin kənarlaşdırılmasına imkan verir.

Qapıların kip bağlandığından əmin olun

Qapı rezinlərinin köhnəlməsi, cırılması və ya çirklənməsi isti havanın soyuducuya daxil olmasına səbəb ola bilər. Nəticədə cihaz temperaturu sabit saxlamaq üçün daha çox enerji sərf edir.

Buna görə qapıların kənarındakı rezinləri mütəmadi yoxlamaq, onları təmiz saxlamaq və zədələndikdə dəyişdirmək vacibdir.

Məhsulları düzgün yerləşdirin

İsti yeməkləri dərhal soyuducuya qoymaq məsləhət görülmür. Onların əvvəlcə soyumasını gözləmək lazımdır. Əks halda, kameranın temperaturu yüksəlir və kompressorun iş yükü artır.

Məhsulları qruplaşdırmaq, qabların üzərinə ad yazmaq və tez-tez istifadə olunan ərzaqları görünən yerdə saxlamaq da qapının açıq qalma müddətini azaldır. Eyni zamanda, soyuducunu həddindən artıq doldurmaq olmaz: bu, soyuq havanın dövranını və məhsulların bərabər soyumasını çətinləşdirə bilər.

Temperaturu düzgün tənzimləyin

Məqalədə soyuducu kamera üçün 4–6 dərəcə Selsi, dondurucu bölmə üçün isə təxminən mənfi 17 dərəcə temperatur tövsiyə olunur. Daha aşağı temperatur seçilməsi enerji sərfiyyatını artıra bilər.

Soyuducunun daxili divarlarında qalın buz qatının yaranması da əlavə enerji sərfiyyatına səbəb ola bilər. Buna görə buzlanmanı izləmək və cihazın təlimatına uyğun şəkildə buzunu əritmək lazımdır. No Frost sistemli modellərdə isə təlimatda nəzərdə tutulmayan üsullarla buz təmizləməyə çalışmaq olmaz.

Mütəxəssislərin fikrincə, bu sadə qaydalara əməl etmək soyuducunun daha səmərəli işləməsinə və elektrik xərclərinin azalmasına kömək edə bilər. Mənbədə bəzi texniki qulluq tədbirləri ilə enerji sərfiyyatını 30 faizə qədər azaltmağın mümkün olduğu qeyd edilsə də, nəticə cihazın modelindən və istifadə şəraitindən asılıdır.

Samir