Azərbaycanda həm mexaniki, həm də avtomatik sürətlər qutusu ilə təchiz edilmiş avtomobillər istifadə olunur. 

HİT.az xəbər verir ki, insanlar avtomobil alarkən şəxsi seçimləri və ya büdcələri əsasında qərar verirlər. Çünki avtomatik sürətlər qutusu olan avtomobillər daha bahalıdır. Bununla belə, idarəetmə baxımından “mexanika” bir çox insan üçün daha üstün seçim olaraq qalır.

Lakin sürücülük təcrübəsi bir neçə onillik təşkil etsə belə, sürücülər sürətlər qutusundakı bəzi hərflərin nə məna daşıdığını həmişə bilmirlər.

Mexaniki sürətlər qutusundakı hərflər nə deməkdir – “E” hərfi nəyi göstərir?

“Supercar Blondie” nəşrinin müəllifləri yazırlar ki, ABŞ-da mexaniki sürətlər qutusu olan avtomobillər artıq əvvəlki populyarlığını demək olar ki, tamamilə itirib və onları getdikcə daha çox avtomatik sürətlər qutusu ilə təchiz edilmiş modellər əvəz edir.

1980-ci illərdə, mexaniki sürətlər qutusunun ən populyar olduğu dövrdə yeni avtomobillərin təxminən 35 faizi mexaniki transmissiya ilə təchiz edilirdi. Nəşrin məlumatına görə, hazırda bu göstərici 0,1 faizdən də aşağıdır.

“Supercar Blondie” müəllifləri bildirirlər ki, hazırda istehsal olunan modellərin sürətlər qutusunda “E” hərfi yoxdur.

Bu hərfə mexaniki sürətlər qutusu olan köhnə avtomobil modellərində rast gəlmək mümkündür. Nəşrin məlumatına görə, “E” hərfi Avropa avtomobillərində, xüsusilə də alman avtomobillərində müvəqqəti olaraq tətbiq edilib.

“E” hərfi “ekonomik” sözünü ifadə edir. Bu rejim beşinci ötürmədən istifadə etməklə hərəkət zamanı yanacağa əhəmiyyətli dərəcədə qənaət etməyə imkan verir.

“E” rejimində daha yüksək ötürməyə keçid mühərrikin daha aşağı dövrlərində həyata keçirilir. Bu isə mühərrikin aşağı dövrlərdə işləməsinə və yanacaq sərfiyyatının azalmasına imkan yaradır.

Bu xüsusiyyət xüsusilə ən yüksək ötürmədə və magistral yollarda yüksək sürətlə hərəkət zamanı faydalıdır.

Hazırda “E” hərfi artıq ötürmə qolu üzərində istifadə edilmir. Bunun əsas səbəbi avtomobilin müxtəlif hərəkət rejimlərində eyni funksiyanın elektron idarəetmə sistemi tərəfindən yerinə yetirilməsidir.

Samir