Portağal və banan təbii şəkər ehtiva etsə də, onların qanda qlükozanın səviyyəsinə təsiri fərqlidir. Mütəxəssislərin fikrincə, qan şəkərinə nəzarət baxımından portağal daha əlverişli seçim hesab olunur. Bununla belə, bananı da qidalanmadan tamamilə çıxarmağa ehtiyac yoxdur.

HİT.az xəbər verir ki, bu barədə "Verywell Health" məlumat yayıb.

Məlumata görə, portağalın qlisemik indeksi 35, bananın isə 48-dir. Bu göstərici portağalın qanda şəkərin səviyyəsini bananla müqayisədə daha az yüksəldə biləcəyini göstərir.

Bununla yanaşı, bananın yetişmə dərəcəsi də mühüm rol oynayır. Yaşıl və tam yetişməmiş bananlarda davamlı nişastanın miqdarı daha çoxdur. Bu karbohidrat növü orqanizmdə daha gec parçalanır, həzmi ləngidir və qlükozanın tənzimlənməsinə müsbət təsir göstərə bilər. Həddindən artıq yetişmiş bananlarda isə qlisemik indeks daha yüksək olur və qan şəkərinin daha sürətlə artmasına səbəb ola bilər.

Araşdırmalarda yaşıl banandan əldə edilən davamlı nişastanın müəyyən miqdarda qəbulunun 2-ci tip diabet və piylənməsi olan insanlarda acqarına qlükoza və insulin göstəricilərinin yaxşılaşması ilə əlaqəli olduğu müəyyən edilib.

Portağalın üstünlüklərindən biri də tərkibindəki C vitamini, pektin və flavonoidlərdir. Xüsusilə pektin həll olunan lif növü olduğundan həzmi və qlükozanın sorulmasını ləngidə bilər. Portağalda olan hesperidin və naringin kimi maddələrin də metabolik sağlamlığa müsbət təsiri ehtimal edilir. Lakin bu birləşmələrin insanlarda diabetə qarşı faydaları ilə bağlı əlavə araşdırmalara ehtiyac var.

Mütəxəssislər bildirirlər ki, qan şəkərinə nəzarət üçün yalnız meyvənin növü deyil, onun necə və hansı miqdarda istehlak edilməsi də əhəmiyyətlidir. Bu baxımdan bir neçə məqama diqqət yetirmək tövsiyə olunur:

- Meyvələri şirə şəklində deyil, bütöv halda yemək;
- Onları qoz-fındıq, yunan yoqurtu və ya kəsmik kimi zülal və faydalı yağ mənbələri ilə birlikdə qəbul etmək;
- Porsiyalara nəzarət etmək;
- Həddindən artıq yetişmiş banan əvəzinə bir qədər kal meyvələrə üstünlük vermək.

Bütöv meyvələrdəki lif qlükozanın sorulmasını ləngitməyə kömək edir. Şirə hazırlandıqda isə lifin bir hissəsi itirildiyindən qanda şəkərin daha sürətlə yüksəlməsi mümkündür.

Araşdırmalar göstərir ki, qan şəkərini nəzarətdə saxlamaq üçün ayrı-ayrı meyvələrdən imtina etməkdənsə, balanslı qidalanmaq, az emal olunmuş məhsullara üstünlük vermək və karbohidrat qəbulunu düzgün tənzimləmək daha vacibdir.

Samir