Elektromobillərin sürətli enerji doldurma stansiyalarından mütəmadi istifadə edilməsi batareyanın ömrünü qısalda bilər. Mütəxəssislər avtomobilin akkumulyatorunu qorumaq üçün gündəlik enerji doldurma zamanı daha yavaş üsullara üstünlük verməyi, sürətli şarjdan isə əsasən uzun səfərlərdə istifadə etməyi məsləhət görürlər.
HİT.az xəbər verir ki, bu barədə “CarScoops” məlumat yayıb.
Mütəxəssislərin sözlərinə görə, yüksək güclü stansiyalarda enerji doldurulması zamanı litium ionlarının batareyanın daxilində hərəkəti sürətlənir. Bu proses bəzi hallarda litiumun elektrodun səthində toplanmasına səbəb olur. Nəticədə enerji saxlamaq üçün istifadə edilə bilən litiumun miqdarı azalır və batareyanın tutumu tədricən aşağı düşür.
Digər mühüm problem isə yüksək temperaturdur. Sürətli şarj zamanı batareyanın qızması onun köhnəlmə prosesini sürətləndirə bilər. Buna görə də bir çox elektromobildə batareyanın enerji doldurulmasından əvvəl optimal temperatura gətirilməsi funksiyası mövcuddur.
Ekspertlər gündəlik istifadə zamanı batareyanın 10-80 faiz aralığında doldurulmasını daha məqsədəuyğun hesab edirlər. Çünki enerji səviyyəsi 80 faizə yaxınlaşdıqca şarj sürəti azalır. Batareyanın 100 faizə qədər doldurulması isə bəzi akkumulyator növlərində əlavə yüklənmə yarada bilər.
Geotab şirkətinin 2026-cı ildə apardığı və təxminən 23 min elektromobili əhatə edən araşdırmanın nəticələri də diqqət çəkir. Məlumata görə, 100 kilovatdan yüksək gücə malik sabit cərəyan stansiyalarından müntəzəm istifadə edən avtomobillər ildə batareya tutumunun 3 faizə qədərini itirə bilər. Daha aşağı güclə doldurulan avtomobillərdə isə bu göstərici təxminən 1,5 faiz təşkil edir.
Bununla belə, mütəxəssislər sürətli enerji doldurmadan tamamilə imtina etməyə ehtiyac olmadığını vurğulayırlar. Uzun məsafəli səfərlər zamanı və vaxt məhdudiyyəti olduqda bu üsul əlverişli seçimdir. Lakin evdə enerji doldurmaq imkanı varsa, gündəlik istifadə üçün daha yavaş şarj üsuluna üstünlük verilməsi tövsiyə olunur.
Batareyanın növü də enerji doldurma qaydalarına təsir göstərir. Litium-dəmir-fosfat (LFP) akkumulyatorları tam doldurulmaya nikel-manqan-kobalt (NMC) batareyaları ilə müqayisədə daha dözümlüdür. Bununla belə, NMC batareyalarını da ara-sıra 100 faizə qədər doldurmaq ciddi problem yaratmır.
Mütəxəssislərin əsas tövsiyəsi elektromobilin batareyasını uzun müddət sağlam saxlamaq üçün sürətli şarjdan gündəlik vərdiş kimi deyil, zərurət yarandıqda istifadə etməkdir.
Samir
