“Boeing” şirkəti yeni 777-8F yük təyyarəsinin ilk nümunəsini ABŞ-ın Everett şəhərində yerləşən istehsal sahəsində hangardan çıxarıb. 

HİT.az xəbər verir ki, bu barədə şirkət rəsmi açıqlama verib.

Bildirilib ki, “Boeing” 777-8F modelinin istehsalına ötən ilin yayında başlayıb. Hazırda əsas diqqət təyyarənin ilk uçuşuna hazırlıq mərhələsinə yönəlib. Bu mərhələ bütün sistemlərin düzgün işlədiyini yoxlamaq baxımından mühüm əhəmiyyət daşıyır.

Yeni 777-8F modeli növbəti nəsil yük təyyarəsi hesab olunur və uçuş məsafəsi və yanacaq səmərəliliyi baxımından əvvəlki modelləri üstələməsi gözlənilir. Bu layihə “Boeing” 777X proqramının inkişafında mühüm mərhələ sayılır.

Təyyarənin uzunluğu təxminən 70,9 metr, qanadlarının açıqlığı isə 71,8 metr təşkil edir ki, bu da onu öz sinfində ən böyük modellərdən birinə çevirir.

777-8F “GE9X” mühərrikləri, kompozit qanadlar və qatlanan qanad ucları ilə təchiz olunacaq. Bu texnologiyaların bir hissəsi “Boeing 787 Dreamliner” modelindən götürülüb.

Təyyarə təxminən 45 palet yük daşıya biləcək, onların 31-i əsas göyərtədə, 13-ü isə aşağı bölmədə yerləşdiriləcək.

Modelin ümumi faydalı yükdaşıma qabiliyyəti 118 ton, uçuş məsafəsi isə təxminən 8160 kilometr olacaq. Bu göstəricilər onu bəzi dörd mühərrikli yük təyyarələri, o cümlədən “Boeing 747-400F” ilə müqayisə edilə bilən səviyyəyə çatdırır.

Artırılmış yükdaşıma qabiliyyəti və uçuş məsafəsi aviaşirkətlərə daha az texniki dayanacaqla daha uzun məsafəli reyslər həyata keçirməyə imkan verəcək.

Samir