İspanaq mikrofisi (Microphis spinachioides) yalnız Papua-Yeni Qvineyadakı Sepik çay sistemində yaşayır. Bu balıq sonuncu dəfə alimlər tərəfindən 1980-ci illərdə qeydə alınıb. Lakin yaxın zamanda onun yenidən aşkar edildiyi bildirilir. 

HİT.az xəbər verir ki, bu barədə "BBC Wildlife Magazine" yazır.

Qeyd olunur ki, Sepik uzunluğu 1 100 kilometrdən çox olan böyük çay sistemidir. Buraya çayın qolları, göllər, meşələr və bataqlıq ərazilər daxildir.

Yerli sakinlər Sepik boyunca yalnız motorlu qayıqlar və ya kanolarla hərəkət edirlər. Kəndlər arasında yol bəzən bir neçə saat çəkir.

"İcmaların hər biri bizi səmimi qarşıladı və çayları haqqında heyrətamiz biliklərini bizimlə bölüşdü. Bura elə bir yerdir ki, elmi tədqiqatlar böyük ölçüdə yerli sakinlərlə əməkdaşlıqdan asılıdır", – "New Guinea Binatang" Tədqiqat Mərkəzinin tədqiqatçısı Cerrika Aqeebo bildirib.

Aqeebo həmkarı Rocer Mayke ilə birlikdə iki həftə ərzində yerli icmalarla söhbətlər aparıb və çayı araşdırıb. Bir müddət sonra onlar yerli sakinlərin fotoşəkillər əsasında ispanaq mikrofisini tanıdıqlarını müəyyən ediblər.

Elmi qrupun ispanaq mikrofisini araşdırmaq məqsədilə apardığı axtarışda əsas fiqurlardan biri yerli balıqçı Helen Asu olub. O, Sepik çayında şirin su krevetlərini tutmaq üçün ənənəvi "umben" əl torundan istifadə edir.

Balıqçı alimlərə bir neçə dəfə ispanaq mikrofisi tutduğunu deyib. Elə növbəti səhər o, çaya çıxaraq həmin balıqdan iki ədəd tutub.

Tədqiqatçılar balığın fotoşəkillərini 1980-ci illərdə Sepik çayında ispanaq mikrofisinin mövcudluğunu təsdiqləyən avstraliyalı ixtioloq Cerald Allena göndəriblər. Alim balığı "itkin" tikanqarın ispanağı kimi tanıyıb.

"Onun biliyi, təşəbbüsü və kömək etmək istəyi olmasaydı, bu yenidən kəşf bəlkə də baş verməzdi", – Aqeebo bildirib.

Samir