Ağsu rayonunun Xasdərə kənd qəbiristanlığında yaşıl soyqırım baş verib. 

Rayon sakini Quliyev Əfras Səttar oğlunun Yenisabah.az-a verdiyi məlumata görə, qəbiristanlıqda 400-500 yaşlı 22 palıd ağacı kəsilib:  

“Hazırda Bakıda yaşayıram. Keçən il dekabr ayının ortalarında qəbiristanlığa valideynlərimi ziyarətə getmişdim. Orada çox acınacaqlı bir mənzərə ilə rastlaşdım. Palıd ağaclarını kəsib daşıyıblar. Ancaq bunu kimin etdiyi bəlli deyil. Mən bu haqda  həmin vaxt “102” xidmətinə və Ekologiya Nazirliyinin Qaynar Xəttinə məlumat verdim. Şəhərə qayıtdıqdan sonra gedib yazılı  şəklində  Daxili İşlər Nazirliyinə, Ekologiya və Təbii Sərvətlər Nazirliyinə, o cümlədən  Prezident Administrasiyasına, Baş Prokurorluğa müraciət elədim. Hadisədən sonra 3 dəfə Ağsuya getdim, Orada Ağsu rayon İcra Hakimiyyətinə və Polis İdarəsinə müraciət elədim, 2 dəfə icranın, 3-4 dəfə də polis rəisinin qəbulunda olmuşam. Təəssüf ki, sadaladıqlarımın heç bir nəticəsi olmadı. Hamısı axtarıb tapacaqlarını dedilər. Oradan azı 30-40 maşın ağac gedib”. 

Şikayətçi iddia edir ki, bu cinayəti təkbaşına törətmək mümkün deyil:

“Meşədə bir budaq kəsilən kimi tapırlar. Bunu necə olur ki, tapa bilmirlər? Məsələni ictimailəşdirmək üçün İctimai Televiziyaya da müraciət elədim. Onlar məndən yazılı müraciət tələb etdilər və çəkiliş oldu. Sonra mənə efirə verəcəklərini dedilər, amma prosesi hər gün yubatdılar. Dediklərinə görə, xəstəliklə əlaqədar işləmirdilər, yəni fərqli  bəhanələr oldu, indi isə efirə verməkdən imtina edirlər. Heç bir səbəb də göstərmirlər. Bu səbəblə mən AzTV-yə üz tutmağa məcbur oldum. Orada bir xanımla qarşılaşdım, xanım məsələni ictimailəşdirəcəyinə söz verdi. Sonra ondan da bir xəbər çıxmadı və ikinci dəfə oraya getməli oldum. Növbədə başqası idi, daxili nömrə ilə kimləsə əlaqə saxladı və məktubla müraciət etməli olduğumu bildirdi. Bu gün oraya məktubumu  verdim, nəticənin nə olacağını isə bilmirəm.  Mən Mətbuat Şurasına da getdim. Oradan bu kimi məsələlərə baxılmadığı bildirildi və məni Milli Televiziya və Radio Şurasına yönəltdilər. Onlar da bu işə baxmadıqlarını dedilər”.