“Azərbaycançılıq xalqımızın tarixi yaddaşını, milli kimliyini, mənəvi dəyərlərini və müstəqil dövlətçilik iradəsini özündə birləşdirən ideologiyadır”.

Bu sözləri Milli Məclisin deputatı Elnarə Akimova Hit.az-a açıqlamasında deyib.

O bildirib ki, bu, bizi keçmişimizə bağlayan, bu günümüzü mənalandıran və gələcəyimizə istiqamət verən mənəvi dayaqdır:

“Azərbaycançılıq Vətəni sevməklə yanaşı, onun dilini, mədəniyyətini və tarixini qorumaq, dövlətin taleyinə sahib çıxmaq, gələcək nəsillər qarşısında məsuliyyət daşımaq deməkdir. Azərbaycançılığın müasir dövlətçilik konsepsiyası kimi formalaşması və möhkəmlənməsi ümummilli lider Heydər Əliyevin adı ilə bağlıdır.

Onun siyasi irsində dövlət müstəqilliyinin qorunması, Azərbaycan dilinin mövqeyinin gücləndirilməsi və milli-mənəvi dəyərlərin yaşadılması vahid dövlətçilik strategiyasının mühüm istiqamətlərini təşkil edirdi. Bu yanaşma Azərbaycançılığı milli duyğuların ifadəsindən daha geniş məna daşıyan, cəmiyyəti ortaq Vətən və ümumi gələcək ətrafında birləşdirən ideoloji dayağa çevirdi”.

Deputat qeyd edib ki, Azərbaycançılığın əsas gücü müxtəlifliyi milli birliyə çevirə bilməsindədir:
“Müxtəlif etnik və dini mənsubiyyətlərə malik insanların birgə yaşadığı Azərbaycan cəmiyyətində bizi birləşdirən ortaq tariximiz, Vətənimiz və dövlətçiliyimizdir. Bu ideologiya fərqləri qarşıdurma səbəbi deyil, milli zənginliyimizin tərkib hissəsi kimi qəbul edir. Çünki həqiqi birlik eynilik yaratmaqda deyil, fərqli xüsusiyyətləri ümumi dövlətçilik mənafeyi ətrafında uzlaşdırmaqdadır.

Ana dili bu birliyin və milli özünüdərkin başlıca dayaqlarındandır. Azərbaycan dili xalqımızın tarixi yaddaşını, düşüncə tərzini və mədəni irsini yaşadan əvəzsiz sərvətdir. Onu qorumaq və elm, təhsil, mədəniyyət, dövlət idarəçiliyi və rəqəmsal mühitdə inkişaf etdirmək milli varlığımızı gələcək nəsillərə ötürmək deməkdir. Müasir dünyaya inteqrasiya milli köklərdən uzaqlaşmaq deyil, öz kimliyini qoruyaraq inkişaf etməkdir”.

Həmsöhbətimiz vurğulayıb ki, ərazi bütövlüyümüzün və suverenliyimizin bərpası Azərbaycançılığın birləşdirici gücünü tarixi miqyasda nümayiş etdirdi:
“Qarabağ Zəfəri xalqımızın milli iradəsinin, dövlətə bağlılığının və həmrəyliyinin təntənəsi oldu. Bu tarixi uğurun davamı isə ölkəmizin iqtisadi, elmi və mədəni potensialını gücləndirməkdən, təhsilin keyfiyyətini yüksəltməkdən və məsuliyyətli vətəndaşlıq mədəniyyətini inkişaf etdirməkdən keçir. Vətənə xidmət yalnız tarixi sınaq anlarında deyil, gündəlik həyatda vicdanlı əmək, qanunlara hörmət və cəmiyyət qarşısında məsuliyyətlə də ölçülür.

Qloballaşma və rəqəmsal informasiya mühitinin genişləndiyi bir dövrdə milli kimliyin qorunması xüsusi əhəmiyyət daşıyır. Azərbaycançılıq dünyadan təcrid olunmaq deyil, milli dəyərlərimizi yaşadaraq yeniliklərə açıq olmaq, tarixi yaddaşımıza söykənərək müstəqil düşünmək bacarığıdır. Bu baxımdan, ailə, məktəb, elm, ədəbiyyat və media üzərinə mühüm vəzifələr düşür. Gənc nəslə tariximizi və mədəniyyətimizi sevdirməklə yanaşı, onlarda bilik, dürüstlük, zəhmətə hörmət və Vətən qarşısında məsuliyyət hissi formalaşdırmaq vacibdir”.

Siyasətçinin sözlərinə görə, Azərbaycançılıq yalnız ictimai çıxışlarda səslənən ideya deyil, gündəlik həyatımızda təzahür etməli olan mənəvi mövqedir:
“Ana dilinə hörmət, milli irsə bağlılıq, qanunlara riayət və ölkənin inkişafına töhfə vermək bu ideologiyanın əməli ifadəsidir. Onun gücü insanların özünü Azərbaycan dövlətinin gələcəyinə cavabdeh hiss etməsində, milli maraqları şəxsi məsuliyyətlə uzlaşdırmasında üzə çıxır”.

Elmir Mustafa