İnsanlar haqqında ilk təəssürat bəzən onların özləri barədə düşündüklərindən fərqli olur. Numerologiyada isə insanın tam adı və soyadındakı samit hərflər əsasında başqalarına necə göründüyünü müəyyənləşdirməyin mümkün olduğu iddia edilir.

HİT.az xəbər verir ki, bu barədə UNIAN nəşri yazıb. 

Nəşrin məlumatına görə, numerologiyada “şəxsiyyət rəqəmi” adlandırılan göstərici insanın xarici görünüşü, davranış tərzi və sosial münasibətlərdə yaratdığı obrazla əlaqələndirilir.

Hesablama zamanı doğum haqqında şəhadətnamədə qeyd olunan tam ad və soyaddakı samit hərflər seçilir. Pifaqor cədvəlinə əsasən hər hərfə rəqəm verilir, daha sonra həmin rəqəmlər toplanaraq birrəqəmli nəticə əldə edilir. Numerologiyada 11, 22, 33, 44 və 55 kimi “usta rəqəmlər” isə olduğu kimi saxlanılır.

Rəqəmlər hansı obrazı ifadə edir?

Numeroloji şərhlərə əsasən, hər rəqəm fərqli xarakter və təəssüratla əlaqələndirilir:

- 1 – özünəinamlı, müstəqil və lider ruhlu insan obrazı yaradır. Bəzən təkəbbürlü və əlçatmaz görünə bilər.
- 2 – mehribanlıq, diplomatik davranış və etibarlılıqla əlaqələndirilir. Belə insanlar yaxşı dinləyici kimi təsvir olunur.
- 3 – şən, ünsiyyətcil və yaradıcı obrazı ifadə edir. Bu rəqəmin sahiblərinin müxtəlif sosial mühitlərə asan uyğunlaşdığı düşünülür.
- 4 – məsuliyyət, nizam-intizam və sabitlik rəmzi sayılır. Bu insanlar ciddi və etibarlı görünə bilər.
- 5 – enerjili, cəlbedici, yeniliklərə açıq və diqqət çəkən obrazla əlaqələndirilir.
- 6 – qayğıkeşlik, mehribanlıq və emosional sabitliyi ifadə edir. Belə insanlar başqalarına dəstək verən şəxslər kimi təqdim olunur.
- 7 – təmkinli, sirli, intellektual və mükəmməlliyə meyilli obrazla əlaqələndirilir.
- 8 – güc, nüfuz, uğur və qərarlılıq rəmzi hesab edilir. Bu rəqəmin insanlarda rəhbərlik qabiliyyəti təəssüratı yaratdığı iddia olunur.
- 9 – səxavət, həssaslıq, idealizm və başqalarına yardım etmək istəyi ilə əlaqələndirilir.

11, 22, 33, 44 və 55 rəqəmləri nə deməkdir?

Numerologiyada bu rəqəmlər xüsusi əhəmiyyət daşıyan göstəricilər kimi təqdim olunur. 11 intuisiya, idealizm və ruhlandırıcı təsirlə, 22 bilik, etibarlılıq və ideyaları həyata keçirmək bacarığı ilə əlaqələndirilir.

33 həssaslıq, fədakarlıq və qayğıkeşliyi, 44 iradə, dözümlülük və zəhmətkeşliyi ifadə edir. 55 isə güclü təsir bağışlamaq, diqqət çəkmək və başqaları üçün nümunəyə çevrilmək kimi xüsusiyyətlərlə əlaqələndirilir.

Qeyd edək ki, numerologiya elmi cəhətdən təsdiqlənmiş metod deyil. Ad və soyad əsasında insanın xarakterini və başqalarında yaratdığı təəssüratı etibarlı şəkildə müəyyənləşdirməyin mümkünlüyünü təsdiqləyən elmi sübutlar yoxdur. Buna görə də bu şərhlər daha çox əyləncə xarakterli yozumlar kimi qəbul edilməlidir.

Samir