Almaniyanın paytaxtı Berlin yaxınlığında, Zeddin kəndi ərazisində təxminən 3 min il əvvələ aid qeyri-adi tikili aşkarlanıb. Arxeoloqlar onun yaşayış evi deyil, dini mərasimlər və ya kollektiv tədbirlər üçün istifadə edilmiş məkan ola biləcəyini ehtimal edirlər.

HİT.az xəbər verir ki, bu barədə “Focus.pl” portalı məlumat yayıb.

Təxminən e.ə. 850-ci ilə aid edilən tikilinin ölçüləri 10,6 x 11,4 metrdir. Demək olar ki, kvadrat formasında olan bu quruluş həmin dövrün Şimali Almaniyasında geniş yayılmış uzun və düzbucaqlı yaşayış evlərindən fərqlənir. Məhz bu qeyri-adi memarlıq xüsusiyyəti tədqiqatçıları tikilinin mümkün funksiyası barədə fərziyyələr irəli sürməyə vadar edib.

Qazıntılar zamanı ərazidə Son Tunc dövrünə aid çoxlu keramika nümunələri də tapılıb. Onların arasında ağız hissəsinin diametri 50 santimetrdən çox olan iri qablar var. Bu tapıntılar həmin məkanda çoxsaylı insanların toplaşdığını, birgə yeməklərin və ya mərasimlərin keçirildiyini göstərə bilər.

Arxeoloqların diqqətini çəkən digər mühüm tapıntı isə üzərində od təsirləri görünən heyvan sümükləridir. Tədqiqatçılar bu qalıqların kollektiv ziyafətlərdən sonra yandırılmış heyvanlara aid ola biləcəyini düşünürlər. Bununla yanaşı, heyvanların dini ayinlər çərçivəsində qurban verilməsi ehtimalı da istisna edilmir.

Qazıntılara rəhbərlik edən Göttingen Universitetinin tədqiqatçısı İmmo Heske bu ərazinin Avropanın Tunc dövründəki sosial və dini həyatını öyrənmək baxımından xüsusi əhəmiyyət daşıdığını bildirib.

Arxeoloqların fikrincə, e.ə. IX əsrdə ərazidə təxminən 200-300 nəfərin yaşadığı yaşayış məntəqəsi mövcud olub. İnsanların əsas məşğuliyyətləri kənd təsərrüfatı, ağac emalı və metallurgiya ola bilərdi.

Sirli tikili ərazinin ən hündür nöqtələrindən birində, Zeddində yerləşən monumental kurqanın yaxınlığında aşkarlanıb. Həmin kurqan ənənəvi olaraq əfsanəvi kral Hinzlə əlaqələndirilsə də, belə bir tarixi şəxsin həqiqətən yaşayıb-yaşamadığı məlum deyil.

Arxeoloqlar hesab edirlər ki, tikilinin memarlıq xüsusiyyətləri, keramika nümunələri və yandırılmış heyvan qalıqları birlikdə araşdırılarsa, qədim insanların ictimai həyatı və dini inancları barədə daha ətraflı məlumat əldə etmək mümkün olacaq.

Samir