O, ərindən daha yaxşı atəş açır, ocaq yandırmağı bilir, klassik paltarları sevir. Çexiyanın prezidentinin həyat yoldaşı, istefada olan polkovnik-leytenant Eva Pavlova birinci xanımın vəzifələrini sələfi İvana Zemanovadan daha enerjili yerinə yetirmək niyyətindədir.

Lent.az xarici mediaya istinadən bildirir ki, Eva Pavlova artıq uşaqları tək böyüdən qadınlara kömək etmək istədiyini açıqlayıb, çünki özü belə bir rolda özünü tapıb.

Eva Pavlova deyir: "Biz bir yerdə ofisdə oturmaq üçün deyil, ilk növbədə ölkəmizi müdafiə etməyə hazır olmaq üçün əsgər olduq".

O, hələ də əlində silahla ölkəni müdafiə edə bilər. İstefada olan polkovnik-leytenant kimi o, təqaüd yaşına çatmazdan əvvəl istənilən vaxt Çexiya ordusu sıralarına çağırıla bilər.

2023-cü il martın 9-da general Petr Pavel Çexiyanın prezidenti kimi fəaliyyətə başlayıb. Ölkə rəhbəri kimi onun yanında həyat yoldaşı da var.

Çexiyada “birinci xanım” kimi rəsmi vəzifə yoxdur. Yəni, dövlət başçısının həyat yoldaşının nə etməli olduğu heç yerdə yazılmayıb. Prezidentin həyat yoldaşının xarici səfərlərdə ərini müşayiət edəcəyi, rəsmi tədbirlərə qatılacağı və digər mərasim vəzifələrini yerinə yetirəcəyi anlaşılandır. Birinci xanımın ənənəvi məşğuliyyəti, təbii ki, xeyriyyəçilik olaraq qalır.
 
Eva Pavlova öz vəzifələrini fəal şəkildə yerinə yetirmək niyyətindədir.

"Mən başa düşürəm ki, bu, birinci xanımın rolunu və bununla da qadınların və ailənin mövqeyini gücləndirmək üçün unikal imkandır", - Eva Pavlova deyib.

Praqa qalasının yeni sahibəsi kimdir?

Eva Zelena 1964-cü il noyabrın 5-də Şumperkdə anadan olub. Bu, 25000-dən az əhalisi olan Moraviyada kiçik bir qədim şəhərdir. Eva gimnaziyada idman atıcılığı ilə fəal məşğul olub. Buraxılış imtahanlarından sonra o, Slovakiyanın Koşitse şəhərindəki qadın hərbi məktəbinə daxil olub, sonra Bratislavadakı Klement Qotvald adınaHərbi-Siyasi Akademiyanı bitirib. 

1989-cu ilə qədər gənc əsgər, gələcək əri kimi, Çexoslovakiya Kommunist Partiyasının üzvü olub - bu qərarı sonradan səhv adlandırıb.

Eva Peter Pavellə hələ 1985-ci ildə, hər ikisi Prosteyov şəhərindəki hərbi bazada xidmət edəndə və eyni yataqxanada yaşayarkən tanış olub. Eva cəsur hərbçini artıq bəyənsə də - 2013-cü ildə “MF Dnes” qəzetinə verdiyi müsahibədə Peterin hələ boz deyil, qara bığının onu heyran etdiyini söyləyib. Amma o vaxt hər ikisi evli olub və heç bir münasibət yaranmayıb. Yalnız bir neçə il sonra, hər ikisi artıq boşandıqda, qarşılıqlı rəğbət romantikaya çevrilib.

Prezidentin həyat yoldaşının birinci evliliyindən bir qızı var, onun da anası kimi adı Evadır – 1992-ci ildə anadan olub. Peter Pavelin ilk evliliyindən iki oğlu var: 33 yaşlı Yan və 30 yaşlı Peter.

Cütlük 2004-cü ildə evlənib, münasibətlərini Moraviyanın Olomouts şəhərinin meriyasında qeyd ediblər. Həyat yoldaşlarının birlikdə uşaqları yoxdur, lakin onların artıq dörd nəvəsi var.

1989-cu ilin “məxməri inqilabı”ndan sonra Eva Pavlova Baş Qərargahda çalışıb və burada Çexiyada işləyən xarici ölkələrin hərbi nümayəndələri ilə əlaqəyə cavabdeh olub.

Təqaüdə çıxdıqdan sonra Eva Pavlova ərini xaricdə işlədiyi müddətdə, o cümlədən 2015-2018-ci illərdə general Pavel Brüsseldə NATO Hərbi Komitəsinə rəhbərlik etdiyi müddətdə müşayiət edib.

Birinci xanım rolunda Eva Pavlova sosial problemləri, o cümlədən qocalara qulluq, qadınlara qarşı ayrı-seçkiliklə mübarizə, boşanmaların qarşısının alınması kimi ailə problemlərini həll etmək niyyətindədir.

“Bizdə nə qədər boşanma olması məni təəccübləndirib. Düşünürəm ki, ibtidai məktəbdə profilaktik tədbirlər görülməlidir. Bu, ailədə dialoqun qurulmasıdır, uşaqları sonradan boşanmalarına yol verməmək üçün addım-addım işlər görülməsidir".

Məhz boşanma məsələləri ilə həm də müəllimlik ixtisası olan Eva Pavlova əri Çexiya prezidentliyinə namizədliyini elan edənə qədər işlədiyi “Manofi” mərkəzində məşğul olub.

Xanım Pavlovanın kommunal siyasətdə də təcrübəsi var: 2022-ci ildən o, ölkənin şimalında, cütlüyün evi olan Çernouçek qəsəbəsinin şurasının müstəqil üzvüdür.

Boş vaxtlarında Eva Pavlova xizək sürmək və fotoqrafiya ilə məşğul olur.

Media qeyd edir ki, yeni prezidentin xanımı geyimdə təmkinli klassik üsluba, yumşaq açıq rənglərə üstünlük verir. Xanım Pavlova çex dizayneri Ştepanka Pivtsovanın xidmətlərindən istifadə edir.

Əlavə etmək qalır ki, yeni sahibə Praqa qalasında sıfırdan başlamalı olacaq, çünki üç il əvvəl hər hansı bir fəaliyyətin aparılmaması səbəbindən keçmiş prezident Vatslav Havelin lərin həyat yoldaşı ilə başlayan birinci xanımın Katibliyi ləğv edilib.