ABŞ prezidenti Donald Trampın administrasiyası virus xəstəliklərinin yayılması ilə mübarizə bəhanəsi ilə sığınacaq istəyən əcnəbilərin ölkəyə girişini qadağan etməyi düşünür. 

HİT.az xəbər verir ki, bu barədə "The Wall Street Journal" (WSJ) yazır.

Jurnalistlərin fikrincə, Amerika rəhbərliyi 42-ci bölmənin təsirini yeniləmək istəyir. Dəyişiklik 2020-ci ilin martında qəbul edilib və COVID-19-un yayılmasına qarşı mübarizə çərçivəsində qeyri-qanuni miqrantların deportasiyasını nəzərdə tuturdu.

Məqalədə qeyd edilir ki, ABŞ-da qızılca və vərəmin yayılması təhlükəsi indi sığınacaq axtaranların deportasiyası üçün bəhanəyə çevrilə bilər. Jurnalistlərin müəyyən etdiyi kimi, ABŞ Səhiyyə və İnsan Xidmətləri Departamenti miqrasiya fonunda virus xəstəliklərinin yayılması ilə bağlı vəziyyəti izləmək üçün öz işçilərini cənub sərhədinə göndərmək niyyətindədir.

Hazırda Kanzas ştatında vərəm epidemiyası müşahidə olunur, Texas ştatında və bir sıra digər regionlarda qızılcaya yoluxma halları qeydə alınıb. Lakin məqalədə vurğulanır ki, bu hadisələrin əcnəbilərin axını ilə bağlı olub-olmadığı hələlik məlum deyil.

Yanvarın 20-də Tramp rəsmi olaraq dövlət başçısı vəzifəsinə başladı və elə həmin gün qeyri-qanuni mühacirlərin ABŞ-a nüfuzunu dayandıracağına söz verib. Üç gün sonra Amerika lideri işğalın dəf edilməsi üçün sərhədə qoşun yeridildiyini elan edib.

Samir