ABŞ prezidenti Donald Tramp İran təhlükəsini qəbul etsə də, Kremlın İrana yalnız silah deyil, həm də məlumat dəstəyi verdiyinə dair toplanmış sübutları görməzdən gəlir.
Hit.az xəbər verir ki, bu barədə “The Wall Street Journal” yazır.
Almaniyanın “Stern” nəşrinin məlumatına görə, Rusiya kəşfiyyatı İranın hərbi obyektləri, uran anbarları və ABŞ kəşfiyyat peyklərinin nəzarətində olan digər məntəqələrin siyahısını tərtib edib. Moskva bu məlumatları Tehranla bölüşüb və bu, ehtimal ki, “həssas obyektlərin” vaxtında boşaldılmasına kömək edib.
Bundan əlavə, Rusiya İranın “Şahed” pilotsuz uçuş aparatlarının ilkin dizaynını təkmilləşdirərək onları daha ölümcül və ələ keçirilməsi çətin edib. “Times of London” yazır ki, müharibənin əvvəlində Kiprdəki Britaniya aviabazasına hücumda istifadə olunan “Şahed” Rusiya hərbi avadanlığı ilə təchiz olunmuşdu.
“Financial Times” və “Associated Press” isə Qərb rəsmilərinə istinadən bildiriblər ki, Rusiya İrana yeni dronlar tədarük edir. Həmçinin Moskvanın Ukraynadakı təcrübəyə əsaslanaraq “taktiki məsləhətlər” verdiyi, o cümlədən zərbələr üçün dronların sayı və uçuş hündürlüyü ilə bağlı tövsiyələr təqdim etdiyi qeyd olunur.
ABŞ-ın ötən ilin iyununda İranın nüvə obyektlərinə zərbələr endirməsindən sonra Rusiya Tehrana müasir daşınan zenit-raket komplekslərinin tədarükü üçün 589 milyon dollarlıq müqavilə bağlayıb. Bu barədə Demokratiyaların Müdafiəsi Fondunun nümayəndəsi Behnam Ben Taleblu məlumat verib. 2029-cu ilə qədər çatdırılması planlaşdırılan 500 kompleks İranın daha əvvəl ABŞ-ın F-15 qırıcısını vurmaq üçün istifadə etdiyi sistemlərə bənzəyir.
Son üç ildə Rusiya İrana həm mülki, həm də hərbi təyinatlı səkkiz peykin aşağı Yer orbitinə çıxarılmasında kömək edib. 2023-cü ildə ABŞ kəşfiyyat nümayəndəsi bildirmişdi ki, Rusiya mütəxəssisləri İranın raket proqramlarının bəzi sahələrində və qitələrarası ballistik raket texnologiyalarına bənzər kosmik aparatların hazırlanmasında dəstək göstərir.
Məqalədə vurğulanır: “Tramp Rusiya ilə ‘strateji sabitlik’ istəyə bilər, lakin Putin ABŞ və onun müttəfiqlərinə zərər vermək niyyətindədir”.
Rusiya–İran əməkdaşlığı barədə digər məlumatlar
Bundan əvvəl Ukrayna kəşfiyyatı Rusiyanın İrana genişmiqyaslı gizli dəstək verdiyini açıqlamışdı. Söhbət hərbi obyektlərin peyk görüntülərinin ötürülməsi və regionda hədəflərə zərbələr üçün istifadə oluna biləcək birgə kiberəməliyyatlardan gedir.
Ukrayna prezidenti Volodimir Zelenski də bəyan edib ki, ABŞ Rusiyanın İrana Yaxın Şərqdəki Amerika bazalarına zərbələr endirməsinə kömək etdiyinə dair sübutlara məhəl qoymur və Rusiya prezidenti Vladimir Putinə “güvənir”.
Samir
