Braziliya Silahlı Qüvvələri 1987-ci ildən etibarən istifadədə olan “Leopard 1A1” tanklarının istismardan çıxarılmasını rəsmi olaraq tamamlayıb. Həmin dövrdə Almaniyadan 120-dən çox istifadə olunmuş döyüş maşını alınmışdı. 

HİT.az xəbər verir ki, bu barədə “Defense Express” məlumat yayıb.

Portalın mütəxəssislərinə görə, 2014-cü ildə Braziliya formal olaraq 128 “Leopard 1A1” tankına sahib idi, lakin 2020-ci ilə qədər bu rəqəm 41 maşına qədər azalıb.

“Leopard 1A1”lərin istismardan çıxarılması prosesi 2010-cu illərin ikinci yarısında başlayıb. Tankların bir hissəsi təlim məqsədilə yenidən təchiz edilib, digər hissəsi isə ehtiyat hissələri üçün sökülüb. Son mərhələdə isə onların metal qırıntısına göndərilərək utilizasiyası həyata keçirilib. Kiçik bir hissə isə tarixi nümunə kimi saxlanılıb.

Bildirilib ki, ehtiyat hissələr çox güman “Leopard 1A5BR” tanklarının döyüş qabiliyyətinin saxlanılması üçün istifadə olunub. Braziliya ordusunda bu modeldən 220 ədəd mövcuddur.

Lakin bu texnikanın saxlanması ilə bağlı ölkədə müəyyən çətinliklər var. Hazırda Braziliya ehtiyat hissələrinin yerli istehsalını təşkil etməyə çalışır və ya ən azı belə planlar olduğunu bildirir. Digər real alternativlər isə demək olar ki, yoxdur.

Mütəxəssislər ehtimal edirlər ki, köhnə tanklar metal qırıntısına göndərilərkən onlardan istifadə oluna biləcək bütün komponentlər çıxarılıb və “Leopard 1A5BR”lərin xidmətində istifadə edilib.

Bu vəziyyət Ukrayna üçün yaxşı xəbər hesab edilmir, çünki ölkə aktiv şəkildə “Leopard 1” tanklarından istifadə edir. Digər tərəfdən, Braziliyanın Ukraynaya hər hansı kömək və ya silah transferi planlaşdırdığı barədə məlumat yoxdur.

Daha əvvəl Latın Amerikası ölkəsi hətta Almaniya vasitəsilə Ukraynaya “Gepard” üçün 35 mm zenit sursatlarının və 105 mm tank mərmilərinin satışına icazə verməkdən imtina etmişdi.

Samir