İspaniyanın qərbində yerləşən torpaq sahəsi əvvəlcə günəş elektrik stansiyası tikintisi üçün ideal hesab olunurdu. Lakin işçilər ərazini təmizləməyə başlayanda yerin dərinliyində daha qədim bir sivilizasiyaya aid izlər aşkar edilib.
HİT.az xəbər verir ki, “Ecoportal” nəşrinin yazdığına görə, İspaniyanın Estremadura bölgəsində, Almendralexo yaxınlığında aparılan işlər zamanı təxminən 5000 illik beşbucaqlı quruluş tapılıb. Quruluşun içərisində Tunc dövrünə aid silahlar da aşkar edilib. Onun dəqiq həndəsi planı ətraf təbii landşaftla kəskin kontrast yaradırdı.
Qazıntılar 100 hektar ərazidə 11 ayrı arxeoloji zonanın olduğunu üzə çıxarıb. Mütəxəssislər bu tapıntıların təxminən e.ə. 3300-cü ilə aid olduğunu bildirirlər. Arxeoloqlar bölgədə ən azı 11 fərqli arxeoloji obyekt müəyyən ediblər.
Tapıntılar minilliklər boyu insan tarixini əhatə edir: mis dövründən Tunc dövrünə qədər, hətta Roma dövrünə aid izlər də aşkar olunub.
Yeraltında o dövr üçün nadir sayılan nəhəng, həndəsi dəqiqliklə inşa edilmiş bir quruluş ortaya çıxıb. Dövrə aid adi dairəvi daxmaların əksinə olaraq, bu struktur kəskin və dəqiq hesablanmış bucaqlara malik idi.
Arxeoloqlar dərin xəndəklərə, möhkəmləndirilmiş sərhədlərə və nəzarət edilən giriş nöqtələrinə diqqət çəkiblər. Quruluşun miqyası onun yüksək səviyyədə planlaşdırıldığını və koordinasiya edildiyini göstərir.
Bundan əlavə, alimlər əhəngdaşı qatının içində qazılmış dərin xəndəklərlə qorunan yaşayış məntəqələri də aşkar ediblər. Bu xəndəklər dairəvi müdafiə sistemi yaradaraq beşbucaqlı bir müdafiə xətti formalaşdırırdı.
“Acciona Energía” şirkəti və yerli arxeoloqların apardığı analizlər göstərib ki, bu məkan Qvadiana çayı vadisində güc mərkəzi olub. Ərazidə həmçinin çoxlu qədim alətlər və ox ucluqları da tapılıb.
Arxeoloqların fikrincə, burada yaşayan insanlar zorakı şəkildə həlak olub. Yanğın və dağıntı izləri bu yaşayış məntəqəsinin hücuma məruz qalaraq məhv edildiyini göstərir.
Tədqiqatçılar hesab edirlər ki, beşbucaqlı forma müdafiə məqsədilə seçilib və döyüşçülərə müxtəlif istiqamətlərdən gələn təhlükələri izləməyə imkan verib. Bu cür planlama həmin dövr üçün olduqca inkişaf etmiş sayılır və bölgənin erkən icmaları haqqında əvvəlki təsəvvürləri dəyişdirir.
Samir
