Təyyarədaşıyan gəmidə işləmək dünyanın ən təhlükəli peşələrindən biri hesab olunur. Buna görə də ekipaj xüsusi qoruyucu avadanlıqdan istifadə edir. 

HİT.az xəbər verir ki, bu barədə “WION” nəşri yazıb.

Məlumata görə, “USS Abraham Lincoln” gəmisində xidmət edən dənizçilər hər gün çəkisi 2 kiloqrama çatan xüsusi ağır çəkmələr geyinməyə məcburdurlar. Bu ayaqqabılar sadəcə uniformanın bir hissəsi deyil, uçuş göyərtəsinin “xaotik mühitində” həyati vacib qoruyucu vasitə sayılır.

Hər çəkmə böyük təzyiqə davam gətirə bilən polad burunluqla təchiz olunub. Bu möhkəmləndirmə yüklü göyərtədə daimi əzilmə təhlükəsinə qarşı mühüm müdafiə təmin edir. Ayaqqabı 30 tonluq təyyarənin ayağın üzərindən keçməsi zamanı insanı xilas edə bilməsə də, çəkisi 1,1 tondan artıq olan avadanlığın düşməsindən qoruyur.

Bundan əlavə, təyyarədaşıyan gəminin göyərtəsi reaktiv mühərriklərin qaz çıxışı səbəbindən son dərəcə yüksək temperaturadək qızır. Dənizçilərin ayaqlarının zədələnməməsi üçün çəkmələr qalın dəri və rezindən hazırlanmış istiliyədavamlı altlıqlarla təchiz edilir. Bu, ekipaja işlək mühərriklərin yaxınlığında təhlükəsiz fəaliyyət göstərməyə imkan verir.

Təyyarədaşıyan gəminin səthi daim yanacaq, yağ və duzlu su ilə örtüldüyündən olduqca sürüşkən olur. Buna görə də çəkmələr xüsusi protektor naxışı ilə hazırlanır. Nəşrin analitiklərinin sözlərinə görə, bu konstruksiya yüksək sürətli əməliyyatlar zamanı yıxılmaların qarşısını alır.

Bundan başqa, altlığa yerləşdirilmiş polad lövhə ayağı iti qırıntılar və ya vintlərin yaratdığı deşilmələrdən qoruyur.

Samir