Everestdə bir şerpa-bələdçi buz yarığına düşərək həlak olub.
HİT.az “The Independent”ə istinadən xəbər verir ki, bu, son iki həftə ərzində dünyanın ən hündür dağında qeydə alınan üçüncü ölüm hadisəsidir. Bildirilir ki, risklərə və qlobal səyahət problemlərinə baxmayaraq, Himalaylara alpinist axını azalmır.
Nepal Ekspedisiya Operatorları Assosiasiyasının nümayəndələri bildiriblər ki, təcrübəli şerpalar yaxın günlərdə Everest zirvəsinə aparan kəndir marşrutlarının quraşdırılmasını başa çatdırmağı planlaşdırırlar. Hava şəraiti əlverişli olarsa, bu, kütləvi qalxışlara yol açacaq.
Nepalın turizm departamentinin nümayəndəsi Himal Qautamın sözlərinə görə, beynəlxalq səyahətlərə və turizm sektoruna təsir göstərən Yaxın Şərqdəki münaqişə belə Everestə qalxmaq istəyənləri dayandırmayıb.
Nepal 400-dən çox Himalay zirvəsinə çıxış imkanı təqdim edir. Lakin alpinistlər arasında əsas maraq yalnız bir neçə onlarla zirvəyə, o cümlədən 8849 metr hündürlüyündəki Everestə yönəlib. Apreldən may ayına qədər davam edən dırmanma mövsümü üçün hakimiyyət artıq hər biri 15 min dollar olan 492 icazə verib. Bu göstərici ötən illə müqayisədə daha yüksəkdir — 2025-ci ildə 478 icazə rəsmiləşdirilmişdi.
Mövsümün əvvəlindən etibarən Himalaylarda həlak olan alpinistlərin sayı beş nəfərə çatıb. İqtisadiyyatı böyük ölçüdə turizm, pul köçürmələri və beynəlxalq yardımdan asılı olan Nepal üçün alpinizm mühüm gəlir mənbəyi olaraq qalır.
21 yaşlı şerpa Fura Qyalcen qar üzərində sürüşərək təxminən 7200 metr yüksəklikdə yerləşən III düşərgə yaxınlığında buz yarığına düşüb və həyatını itirib. Bu barədə turizm departamentinin nümayəndəsi Nişa Txapa Ravat məlumat verib.
Mövsümün əvvəlində digər nepallı alpinist — 35 yaşlı Bidjay Qximire Bişvakarma — Xumbu buz şəlaləsində akklimatizasiya zamanı həlak olmuşdu. Bundan əlavə, ayın əvvəlində 51 yaşlı şerpa Lakpa Dendi baza düşərgəsinə gedən yolda ölüb.
Ötən həftə həmçinin 53 yaşlı amerikalı Yohannesen Şellinin dünyanın beşinci ən hündür zirvəsi olan Makalu dağında öldüyü məlum olub. Daha bir alpinist — çexiyalı David Ronbinek isə qonşu Makalu II zirvəsində həyatını itirib. Bu hadisələrin detalları rəsmi şəkildə açıqlanmayıb.
Apreldə Everest marşrutunun hazırlanması da böyük buz uçqunu səbəbindən çətinləşmişdi. Nəticədə zirvəyə aparan yolun açılması təxminən iki həftə gecikmiş, yüzlərlə alpinist isə baza düşərgəsində gözləməli olmuşdu.
Samir
