1970-ci ildə dövlət qeydiyyatına alınan Nikitin adına Kolxoz (VÖEN – 5400029191) adını və təşkilati-hüquqi formasını dəyişərək “İvanovka Aqropark” Açıq Səhmdar Cəmiyyətinə çevrildiyini elan edib.

Yeniavaz.com xəbər verir ki, Nikitin adına Kolxoz Azərbaycanda “kolxoz” kimi dövlət qeydiyyatında olan yeganə təşkilat olub.

Məlumat üçün bildirək ki, hüquqi ünvanı İsmayıllı rayonunun İvanovka kəndində yerləşən Nikitin adına Kolxozun qanuni təmsilçisi Vasiliy Uryupin İvanoviçdir.

Qeyd edək ki, hazırda kolxozun dövlət büdcəsinə böyük həcmdə – 64 min 301 manat 54 qəpik vergi borcu da var.

Xatırladaq ki, vaxtı ilə Azərbaycanın ən gəlirli kənd təsərrüfatı təşkilatlarından biri olan Nikitin adına Kolxozun adı müxtəlif maliyyə problemlərində hallanır. 2022-ci ildə İqtisadiyyat Nazirliyi yanında Dövlət Vergi Xidməti 10 saylı Ərazi Vergilər İdarəsi kolxoza rəhbərlik edən şəxsin ölkədən getmək hüququnun müvəqqəti məhdudlaşdırılması ilə bağlı məhkəmədə iddia qaldırıb.

2022-ci ildə isə Nikitin adına Kolxozun ferma müdiri Timofey Uryupin və baytar həkim Cahid İsmayılov barəsində Cinayət Məcəlləsinin 179.3.2 (mənimsəmə və ya israf etmə) və 313-cü (vəzifə saxtakarlığı) maddələri ilə cinayət işi açılıb. Ağır Cinayətlər Məhkəməsində T.Uryupinə 2 il 6 ay, C.İsmayılov isə 2 il müddətinə şərti cəza verilib.