İyunun 26-sı Azərbaycanda Silahlı Qüvvələr Günü kimi qeyd olunur. Bu tarix ölkənin hərbi qüdrətinin, dövlət müstəqilliyinin və təhlükəsizliyinin rəmzlərindən biri hesab edilir.
Bu gün Azərbaycan Ordusunun formalaşması, inkişafı və əldə etdiyi nailiyyətlərə nəzər salmaq baxımından xüsusi əhəmiyyət daşıyır. Güclü maddi-texniki bazaya, peşəkar şəxsi heyətə və yüksək döyüş qabiliyyətinə malik olan Azərbaycan Ordusunun bugünkü səviyyəyə yüksəlməsi uzun illər ərzində həyata keçirilən məqsədyönlü dövlət siyasətinin nəticəsidir.
Azərbaycanın güclü və peşəkar orduya malik dövlətə çevrilməsinin təməlində uzun illər ərzində həyata keçirilən məqsədyönlü siyasət dayanır. Bu strategiyanın əsas istiqamətləri Ümummilli Lider Heydər Əliyev tərəfindən müəyyənləşdirilmiş, milli təhlükəsizlik və müdafiə məsələləri dövlət quruculuğunun prioritet sahələrindən biri kimi qəbul edilib. Hələ ötən əsrin sonlarında hərbi kadr hazırlığının genişləndirilməsi və milli zabit korpusunun formalaşdırılması istiqamətində atılan addımlar sonrakı uğurlar üçün möhkəm zəmin yaratmışdı.
Müstəqilliyin ilk dövründə ölkənin qarşılaşdığı ciddi çağırışlar güclü ordunun vacibliyini bir daha ortaya qoyurdu. Məhz Heydər Əliyevin rəhbərliyi ilə dövlət idarəçiliyində sabitlik təmin edildi, müdafiə sistemi yenidən təşkil olundu və Silahlı Qüvvələrin vahid komandanlıq əsasında inkişafı üçün zəruri mexanizmlər yaradıldı. Bu proses Azərbaycanın dövlətçiliyinin möhkəmlənməsində mühüm rol oynadı.
Sonrakı mərhələdə Prezident İlham Əliyevin rəhbərliyi ilə hərbi sahədə həyata keçirilən genişmiqyaslı proqramlar ordunun imkanlarını əhəmiyyətli dərəcədə artırdı. Müdafiə sənayesinin inkişafı, müasir texnologiyaların tətbiqi, beynəlxalq təcrübənin öyrənilməsi və döyüş hazırlığının təkmilləşdirilməsi nəticəsində Azərbaycan Ordusu yeni keyfiyyət mərhələsinə yüksəldi. Ordunun ən son silah sistemləri ilə təmin olunması, hərbi infrastrukturun yenilənməsi və şəxsi heyətin peşəkarlığının artırılması ölkənin müdafiə qüdrətini daha da gücləndirdi.
Azərbaycan Silahlı Qüvvələrinin əldə etdiyi nailiyyətlər müxtəlif beynəlxalq qiymətləndirmələrdə də öz əksini tapdı. Ordumuzun gücü illər ərzində keçirilən təlimlərdə və müxtəlif hərbi missiyalarda təsdiqlənsə də, onun real imkanları 2020-ci ildə baş vermiş Vətən müharibəsi zamanı bütün dünyaya nümayiş etdirildi.
44 günlük müharibə Azərbaycanın hərb tarixində dönüş nöqtəsi oldu. Ali Baş Komandan İlham Əliyevin rəhbərliyi altında həyata keçirilən uğurlu əməliyyatlar nəticəsində işğal altında olan ərazilər azad edildi və ölkənin ərazi bütövlüyü bərpa olundu. Bu qələbə yalnız döyüş meydanında qazanılmış uğur deyil, həm də xalqın birliyinin, dövlətin qətiyyətinin və ordunun peşəkarlığının təcəssümü idi. Azərbaycan hərbçisi yüksək döyüş əzmi və vətənpərvərlik nümunəsi göstərərək tarixi missiyanı yerinə yetirdi.
Müharibədən sonra da Silahlı Qüvvələrin modernləşdirilməsi prosesi davam etdirilir. Yeni hərbi hissələrin yaradılması, komando birliklərinin formalaşdırılması, müasir döyüş təcrübəsinin tətbiqi və texniki imkanların genişləndirilməsi ordunun gələcək inkişafının əsas istiqamətlərini təşkil edir.
Günel Cəlilova
