İqtisadi bərabərsizlik insanların ciddi narazılığına səbəb olan və tez-tez siyasi sarsıntıların əsasını təşkil edən amillərdən biridir. Bununla belə, varlı insanlar çox vaxt fərqində olmurlar ki, onlara adi görünən bir çox şey orta və ya aşağı gəlirli insanlar üçün ya məhdud, ya da tamamilə əlçatmazdır.

Hit.az xəbər verir ki, sosial münasibətlər üzrə diplomlu mütəxəssis Zaida Slabbekkorn “Yourtango” üçün yazdığı məqalədə varlı insanların sahib olduğu və hamıda varmış kimi səhvən qəbul edilən nümunələri sadalayıb.

“Sərbəst” pul

Məcburi xərclərdən sonra qalan sərbəst pulun olması bir çox insan üçün əslində lüks sayılır. İnsanların böyük hissəsi təkcə maliyyəni düzgün idarə etmədiyi üçün deyil, həm də gəlirlərin çox aşağı olması səbəbindən yığıma malik olmur və gündəlik xərclərə güclə çatır.

Pul tükənməsi qorxusunun olmaması

Məqalədə qeyd olunur ki, insanların əksəriyyəti daim maliyyə narahatlığı yaşayır, halbuki pul barədə tam rahatlıq yalnız varlı ailələr üçün xarakterikdir.

Öz evinin olması

Əgər valideynlər miras olaraq ev qoymayıbsa, yeni ev almaq əksər insanlar üçün ciddi problemə çevrilir. Bu, yalnız əhalinin kiçik varlı hissəsinə asanlıqla nəsib olur.

Keyfiyyətli müalicə

Əhalinin böyük hissəsi tam həcmdə tibbi xidmət ala bilmir və adətən yalnız ən zəruri müalicə ilə kifayətlənir. Bahalı əməliyyatlar və mürəkkəb terapiyalar isə əsasən varlıların imkanı daxilindədir.

Tam məzuniyyətlər

Müəllifin qeyd etdiyinə görə, evdən kənarda istirahət etmək hətta orta gəlirli insanlar üçün də getdikcə daha əlçatmaz olur.

Keyfiyyətli təhsil

Aparıcı universitetlərdə təhsilin yüksək qiyməti və əlavə xərclər ali təhsili bir çox ailələr üçün böyük maliyyə yükünə çevirir.

İnvestisiyalar

Məqalədə vurğulanır ki, adi insanlar gəlirlərini artırmaq üçün investisiya barədə az düşünürlər. Buna həm maliyyə savadsızlığı, həm də yığımların olmaması mane olur.

Uşaq böyütmək

Müasir dövrdə paradoks müşahidə olunur: ya çox kasıb, ya da çox varlı insanlar daha çox uşaq sahibi olur. Orta gəlirli ailələr üçün isə uşaqlar ciddi maliyyə yükünə çevrildiyindən, bir uşaqla kifayətlənmək daha yayğın hal alır.

Təqaüdə çıxmaq

Müəllifin qeyd etdiyi kimi, bir çox insan üçün pensiya rahat istirahət dövrü olmur və onlar müxtəlif formalarda işləməyə davam edirlər.

Tək yaşamaq

Yüksək kirayə və mənzil qiymətləri səbəbindən getdikcə daha çox insan ya başqaları ilə birlikdə yaşayır, ya da valideynlərinin yanına qayıdır.

Samir