Pişiklər sahibinə sevgisini çox incə şəkildə göstərir və kimi “öz insanı” kimi qəbul etdiyini davranışları ilə bildirir. Mütəxəssisə görə, insanla dostluq pişik üçün yalnız sağ qalmaq deyil, həm də emosional rifah və inkişaf üçün vacibdir.

Hit.az xəbər verir ki, baytar Liza Kanın sözlərinə görə, pişiklər sevgilərini hər zaman açıq şəkildə göstərməsələr də, həyatlarında olan insanlarla güclü bağlar qururlar.

Onun fikrincə, insanla yaxın münasibət pişik üçün mühüm əhəmiyyət daşıyır: mütəmadi müsbət ünsiyyət heyvanın daha rahat və balanslı olmasına kömək edir.

Aşağıda pişiyin sizi öz “ən yaxın dostu” kimi qəbul etdiyini göstərə bilən 9 davranış əlaməti təqdim olunur.

1.Pişik ayaqlarınıza sürtünür

Bu, ən tanınan, amma eyni zamanda ən səmimi davranışlardan biridir.

“Pişik ayaqlarınıza sürtünərkən öz qoxusunu buraxır. Bu həm salamlaşma, həm də sizlə əlaqəni yeniləmə üsuludur”, deyə Liza Kan bildirib.

Bu davranış pişiyin sizi öz yaxın çevrəsinin bir hissəsi kimi işarələməsi deməkdir.

2.Pişik səhərlər sizin yanınıza miyoldayır

Pişiklər tez-tez oyandıqdan sonra sevdikləri insanı axtarırlar.

Baytarın sözlərinə görə, yetkin pişiklər əsasən miyoldamağı digər pişiklərlə deyil, insanlarla ünsiyyət üçün istifadə edirlər və bu, diqqət və ya qayğı istəyi ola bilər.

3.Pişik ayaqlarınızın yanında yatır

Əgər pişik sizin yaxınınızda və ya ayaqlarınızın yanında yatırsa, bu güvən əlamətidir.

“Yuxu pişik üçün ən həssas vəziyyətdir. Əgər o sizin yanınızda yatırsa, özünü təhlükəsiz hiss edir”,  deyə Kan qeyd edib.

4.Pişik toxunmağa icazə verir

Pişiklərin hamısı yad insanlara toxunmağa icazə vermir.

Əgər pişik sizi oxşamağa imkan verirsə və ya özü bunu istəyirsə, bu güclü emosional bağın göstəricisidir.

5.Pişik sizinlə oynayır

Hətta yetkin pişiklər də sahibləri ilə oyun oynamağı sevirlər.

Oyun yalnız instinktlərin ifadəsi deyil, həm də pişiyin sizə yaxınlıq göstərmə üsuludur.

6.Pişik başını sizə sürtür

Bu davranış “bantinq” adlanır.

Pişik üzünü, başını və ya bədənini sizə sürtərək qoxusunu yayır və sizi öz “dost çevrəsinə” daxil edir.

7.Pişik sizi yalayır

Baytarın sözlərinə görə, bu davranış güvən və bağlılıq əlamətidir.

Pişik əlinizi, qolunuzu və ya saçınızı yalayırsa, bu, sizi öz sosial qrupunun bir hissəsi kimi qəbul etdiyini göstərir.

8.Pişik sizə yavaş-yavaş göz qırpır

Bu, ən incə etibar siqnallarından biridir.

Yavaş göz qırpma pişiyin rahat və təhlükəsiz hiss etdiyini göstərir. Əgər siz də eyni şəkildə cavab versəniz, bu əlaqəni gücləndirir.

9.Pişik sizi izləyir

Pişiklər tez-tez sahiblərini izləyir və onların yanında qalmağa çalışırlar.

Bu davranış sadəcə maraq deyil, həm də sizinlə eyni məkanda olmaq istəyinin göstəricisidir.

Samir