Xeyirxahlıq və empatiya insanı insan edən əsas xüsusiyyətlərdəndir. Lakin bəzi insanlar bu keyfiyyətlərdən məhrumdurlar. Belə şəxslər adətən asanlıqla seçilən toksik davranış nümunələri nümayiş etdirsələr də, gündəlik söhbətlərdə istifadə etdikləri bəzi ifadələr emosional manipulyasiyanın daha gizli əlaməti ola bilər.

Hit.az xəbər verir ki, "YourTango" nəşrinin yazdığına görə, bu cür insanlar ətrafındakıları manipulyasiya etmək və məsuliyyətdən yayınmaq üçün tez-tez aşağıdakı ifadələrdən istifadə edirlər.

1."Mən pis heç nə etməmişəm"

Yalnız öz maraqlarını düşünən insanlar sosial nüfuzlarına və rahatlıqlarına xələl gətirə biləcək davranışları etiraf etmək istəmirlər. Onlar məsuliyyəti üzərlərindən atmaq üçün hadisələri öz xeyirlərinə uyğun şəkildə təqdim etməyə çalışırlar.

2."Yalan deməmişəm ki"

Yalanı və ya aldatmanı müxtəlif bəhanələrlə əsaslandırmaq empatiyadan uzaq insanların tipik davranışıdır. Onlar diqqət mərkəzində olmaq və ya rahatlıqlarını qorumaq üçün başqalarının zərərinə olsa belə, bunu normal hesab edirlər.

3."Bununla barışmalısan"

Belə insanlar başqalarının ağrı və çətinliklərinə qarşı laqeyd olurlar. Problemlə üzləşən insan onların yanında özünü daha da tənha hiss edə bilər.

4."Mən bunu etməyəcəyəm"

Empatiyası zəif olan narsist xarakterli şəxslər qaydalara əməl etməyi sevmirlər. Onlar özlərini başqalarından üstün hesab edir və münasibətlərdə qarşılıqlı hörmət və dəstək prinsiplərinə əhəmiyyət vermirlər.

5."Öz başının çarəsinə bax"

Əgər yardım etməklə özlərinə fayda əldə etmirlərsə və ya bunu görən olmursa, başqalarına dəstək göstərməyə maraq göstərmirlər.

6."Belə şeylər olur"

Bəzən bu ifadə "bu sadəcə biznesdir" kimi də səslənə bilər. Belə insanlar pulun və ya yüksək statusun pis davranışa haqq qazandırdığını göstərməyə çalışırlar ki, məsuliyyətdən yayına bilsinlər.

7."Sən hər şeyi ürəyinə salırsan"

Onlar başqalarının empatiyasını və həssaslığını zəiflik kimi təqdim edir, bununla da öz kobud davranışlarını gizlətməyə çalışırlar.

8."Mən heç kimə heç nə borclu deyiləm"

Belə insanların ehtiyacları və rahatlığı hər zaman birinci yerdə olur. Başqalarının maraqlarını nəzərə almamaq üçün müxtəlif bəhanələr gətirməkdən çəkinmirlər.

9."Onun mənə nə faydası var?"

Onlar münasibətlərə qarşılıqlı fayda prinsipi ilə yanaşır və insanları yalnız özlərinə verə biləcəyi üstünlüklərə görə qiymətləndirirlər. Əgər qarşı tərəfdən qazanc görmürlərsə, həmin insana vaxt ayırmağa dəymədiyini düşünürlər.

10."Bu, ədalətsizlikdir"

Özünü başqalarından üstün görən insanlar qarşılaşdıqları çətinliklərə görə daim taleyi və ya "ədalətsizliyi" günahlandırırlar, məsuliyyəti isə nadir hallarda öz üzərlərinə götürürlər.

Samir