İşlənmiş əşyaların alınmasını xəzinə axtarışına bənzətmək olar. İkinci əl (Sekond-hend) mağazalarında yeni məhsullardan heç də geri qalmayan, hətta keyfiyyət baxımından onları üstələyən geyimlərə rast gəlmək mümkündür. Belə mağazalarda brend və ya vintage əşyaları münasib qiymətə tapmaq da mümkündür. Lakin bütün məhsulları ikinci əl almaq məsləhət deyil.

HİT.az bu barədə" Martha Stewart"a istinadən xəbər verir.

Sekond-henddə nə almaq olmaz?

"Martha Stewart" nəşri ikinci əl alış-veriş üzrə ekspertlərdən belə mağazalardan hansı geyimləri heç vaxt almadıqlarını soruşub. Mütəxəssislər bəzi məhsullardan uzaq durmağı tövsiyə ediblər. Səbəb təkcə gigiyena deyil: bəzi hallarda keyfiyyətsiz əşya almaq və sonradan təmirə qənaət etdiyinizdən daha çox pul xərcləmək mümkündür.

Alt paltarı

Əksər insanlar sekond-henddən alt paltarı, büstqalter və corab almağın düzgün olmadığını bilir. Bu əşyalar şəxsi istifadə üçün nəzərdə tutulduğundan mikroblarla çirklənmiş ola bilər. Qiyməti çox aşağı olsa belə, risk etməmək daha yaxşıdır.

Çimərlik geyimləri

Mütəxəssislər eyni səbəblərdən ikinci əl çimərlik geyimlərindən də uzaq durmağı tövsiyə edirlər. Bununla belə, gigiyenik etiketləri zədələnməmiş çimərlik geyimini nisbətən təhlükəsiz hesab etmək olar. Lakin geyinməzdən əvvəl onu mütləq yumaq lazımdır.

Keyfiyyətsiz sintetik geyimlər

Sekond-hend mağazalarında bəzən "sürətli moda" kateqoriyasına aid ucuz sintetik geyimlərə rast gəlinir. Ekspertlər belə məhsullardan uzaq durmağı məsləhət görürlər. Bu cür parçalar uzun müddət istifadə üçün nəzərdə tutulmur və bir neçə həftə ərzində yararsız hala düşə bilər. Təbii parçalardan hazırlanmış və daha uzun müddət öz görünüşünü qoruyan geyimlərə üstünlük vermək daha məqsədəuyğundur.

Vintage ayaqqabılar

Sekond-henddə nadir və gözəl ayaqqabı tapmaq böyük şirnikləndirici ola bilər. Lakin ekspertlər belə alışdan çəkinməyi tövsiyə edirlər. Ayaqqabının iç hissəsi xaricdən normal görünsə belə, ciddi şəkildə köhnəlmiş ola bilər. Həmçinin altlığın tezliklə qopması və ya ayaqda narahatlıq yaratması riski var.

Cırılmış astarlı gödəkçələr

İkinci əl üst geyimi alarkən onun daxili astarasını mütləq yoxlamaq lazımdır. Astar zədələnibsə, satıcının onu asanlıqla təmir etməyin mümkün olduğu barədə sözlərinə çox güvənmək məsləhət deyil. Belə parçalar çirki və bakteriyaları daha tez toplaya bilər.

Ləkəli şalvarlar

Sekond-henddən şalvar almaq istəyirsinizsə, onu mütləq tərsinə çevirib, xüsusilə qasıq nahiyəsini diqqətlə yoxlayın. Bəzi ləkələr geyimin ön hissəsindən görünməsə də, daxili tərəfdə aydın şəkildə nəzərə çarpa bilər.

Kaşmir sviterlər

Adi mağazalarda kaşmir kifayət qədər baha satılır və sekond-henddə belə geyim almaq xeyli qənaət etməyə imkan verə bilər. Lakin bu parçadan hazırlanmış məhsulu almazdan əvvəl xüsusilə diqqətlə yoxlamaq lazımdır.

Əsasən qoltuqaltı nahiyəsinə diqqət yetirmək və geyimdə çoxlu tiftik olub-olmadığını yoxlamaq tövsiyə olunur. Çoxlu tiftik məhsula düzgün qulluq edilmədiyini və onun uzun müddət istifadə edilə bilməyəcəyini göstərə bilər. Həmçinin güvə izlərinin olub-olmadığını yoxlamaq lazımdır, çünki bu həşəratlar kaşmiri xüsusilə sevir.

Çox köhnəlmiş və cırılmış əşyalar

Əhəmiyyətli endirimlə satılan, lakin ciddi təmir və ya dəyişiklik tələb edən geyimləri almazdan əvvəl yaxşı düşünmək lazımdır. Belə məhsulların təmiri üçün tələb olunan məbləğ yeni geyimin qiymətini belə ötə bilər.

Ekspertlərin fikrincə, mağaza satıcıları məhsulu daha tez satmaq üçün problemin nə qədər ciddi olduğunu olduğundan daha az göstərə bilərlər. Buna görə də alışdan əvvəl əşyanın vəziyyətini diqqətlə qiymətləndirmək vacibdir.

Samir