İnsan öz həyatının hansı istiqamətdə getdiyini bilmədikdə və gələcəyi ilə bağlı qərarsızlıq yaşadıqda bunu gündəlik danışığında da büruzə verə bilər. Mütəxəssislərin fikrincə, bəzi ifadələr insanın özünü itirmiş və çıxılmaz vəziyyətdə hiss etdiyini göstərə bilər.

HİT.az xəbər verir ki, “YourTango” nəşri həyatı ilə bağlı qeyri-müəyyənlik yaşayan insanların söhbət zamanı istifadə etdiyi səkkiz ifadəni açıqlayıb.

1. “Nə etdiyimi bilmirəm”

İnsanın qarşısında konkret istiqamət görməməsinin ən açıq ifadələrindən biri budur. Bir çox insan bilmədiyini etiraf etməkdən çəkinir. Buna görə də belə bir etiraf daxili çətinliyin göstəricisi ola bilər.

2. “Hamıdan geri qaldığımı düşünürəm”

İnsanlar bəzən ətrafındakıların həyatını özləri ilə müqayisə edərək onların hər şeyə daha yaxşı nəzarət etdiyini düşünürlər. Bu zaman öz həyatının qaydasında olmadığını hiss edən şəxs başqalarının daha uğurlu olduğunu zənn edə bilər.

3. “Sanki nəsə çatışmır”

Həyatda müəyyən boşluğun olduğunu düşünmək də qərarsızlığın əlamətlərindən biri sayılır. Bu hiss uzun müddət eyni rutinlə yaşamaq və həyatına yenilik gətirməmək nəticəsində yarana bilər. Lakin motivasiyanın tamamilə itməsi və heç nəyi dəyişə bilməyəcəyinə inanmaq vəziyyəti daha da ağırlaşdıra bilər.

4. “Çevrildiyim insanı özüm də tanımıram”

İnsanın özünü əvvəlki halından fərqli hiss etməsi də diqqət çəkən məqamdır. Dəyərləri, məqsədləri və davranışları ilə əvvəlki özü arasında ciddi fərq yarandıqda insan gələcəkdə nə edəcəyini müəyyənləşdirməkdə çətinlik çəkə bilər.

5. “Kaş hər şeyə yenidən başlaya biləydim”

Həyatdakı problemlərdən sonra hər şeyi sıfırdan başlamaq arzusu geniş yayılmış düşüncələrdəndir. Lakin insan daim keçmişdən qaçmaq və həyatını tamamilə yenidən qurmaq istəyirsə, bu, daha dərin narahatlığın göstəricisi ola bilər.

6. “Bilmirəm problem var, yoxsa sadəcə yorulmuşam”

Bəzən insan keçirdiyi emosional çətinliyi yalnız yorğunluq kimi qiymətləndirir. Halbuki gərgin həyat tərzi həm fiziki, həm də emosional yorğunluğa səbəb ola bilər. Bu səbəbdən insanın öz hisslərinin əsl səbəbini müəyyənləşdirməsi vacibdir.

7. “Kaş kimsə mənə nə etməli olduğumu desəydi”

Növbəti addımını müəyyənləşdirə bilməyən insan qərarları başqasının verməsini arzulaya bilər. Bu, davamlı qərar qəbul etməkdən yaranan psixoloji yorğunluqla əlaqəli ola bilər.

8. “Görəsən, nə vaxtsa hər şey yaxşı olacaq?”

Gələcəyin yaxşılaşacağına inamın itməsi daha ciddi narahatlıq doğuran əlamətlərdən biridir. İnsan həyatının çıxılmaz nöqtəyə çatdığını düşünürsə, bu, ümidsizlik hissinin gücləndiyini göstərə bilər.

Mütəxəssislər belə vəziyyətlərdə insanın özünü tamamilə tək qoymamasını və ehtiyac olduqda yaxınlarından və peşəkar dəstəkdən yardım almasını tövsiyə edir. Hətta hər şeyin dəyişməyəcəyini düşündüyünüz dövrdə belə, kiçik addımlar atmaq vəziyyətdən çıxış üçün başlanğıc ola bilər.

Samir