Müasir gənclər həyat tərzi, işə münasibət və sosial davranışlarına görə tez-tez yaşlı nəsillərin tənqidinə məruz qalırlar. Lakin mütəxəssislər hesab edir ki, Z nəslinin üzləşdiyi bir sıra problemlər onların şəxsi seçimlərindən çox, yaşadıqları dövrün şərtləri ilə bağlıdır.
HİT.az xəbər verir ki, “YourTango” nəşri müxtəlif nəsillərin Zumerlərə münasibətini araşdırıb. Sosial münasibətlər üzrə ekspert Zayda Slabekornun fikrincə, nəsillər arasında fikir ayrılığı yalnız ənənəvi dəyərlərlə bağlı deyil. İqtisadi çətinliklər və müasir texnologiyalardan asılılıq da gənclərin həyatına ciddi təsir göstərir.
Müəllif bu məsələyə üç fərqli baxışın olduğunu qeyd edir: 1980-ci ildən əvvəl doğulan “bumer” və X nəsli, 1981-1996-cı illərdə doğulan millenniallar və 1997-2012-ci illərdə dünyaya gələn Z nəsli.
Yaşlı nəsil nə düşünür?
Yaşlı nəsillərin Zumerlərlə bağlı əsas iradlarından biri onların smartfon və sosial şəbəkələrdən həddindən artıq istifadə etməsidir. Ekspertlər də ekran qarşısında çox vaxt keçirməyin yuxuya, diqqətin cəmlənməsinə və tənqidi düşünmə qabiliyyətinə mənfi təsir göstərə biləcəyini bildirirlər.
Sosial şəbəkələr gənclərin özlərini daim başqaları ilə müqayisə etməsinə də səbəb ola bilər. Bu isə onların özünə münasibətinə və şəxsiyyət hissinə təsir göstərir.
Yaşlı nəsillər həmçinin hazır məlumat və xidmətlərin həddindən artıq əlçatan olmasının gənclərin müstəqillik və çətinliklərə davamlılıq qabiliyyətinin formalaşmasına mane olduğunu düşünürlər. Onların yanaşmasında “problemi özün həll et” prinsipi əsas yer tutur.
Millennialların mövqeyi
Millenniallar isə Zumerlərin davranışına bir qədər fərqli yanaşırlar. Onların fikrincə, gənclər öz həyatlarını əvvəlki nəsillərin müəyyən etdiyi ənənəvi qaydalara uyğun qurmaq istəmirlər.
Bu, iş yerində geyim qaydalarından tutmuş ailə və karyera ilə bağlı klassik həyat ssenarilərinə qədər müxtəlif sahələrdə özünü göstərə bilər. Gənclər cəmiyyətin formalaşdırdığı stereotipləri və müəyyən edilmiş normaları daha çox sorğulayırlar.
Millennialların fikrincə, Z nəslinin öz yolunu seçmək istəyi onun əsas xüsusiyyətlərindən biridir. Onlar əvvəlki nəsillərin qəbul etdiyi bir çox sosial qəliblərlə barışmağa daha az meyllidirlər.
Zumerlərin öz fikri
Maraqlıdır ki, Z nəslinin nümayəndələri özlərinə yönələn tənqidin müəyyən hissəsi ilə razılaşırlar. Onlar smartfonlardan və sosial şəbəkələrdən həddindən artıq istifadənin həyat keyfiyyətinə mənfi təsir etdiyini anlayırlar.
Bu səbəbdən bəzi gənclər rəqəmsal alətlərdən daha az istifadə etməyə və daha “analoq” həyat tərzinə qayıtmağa çalışırlar. Sonsuz sosial media axını və başqalarının ideal həyat görüntülərini izləmək onların bir qismini yorur.
Bununla yanaşı, Z nəsli ciddi iqtisadi və sosial təzyiqlərlə də üzləşir. Gənclər gündəlik xərcləri qarşılamaq, tənhalıqla mübarizə aparmaq, sosial əlaqələr qurmaq və eyni zamanda gələcək karyeralarını formalaşdırmaq məcburiyyətindədirlər.
Müəllifin fikrincə, nəsillər arasındakı anlaşılmazlıq vəziyyəti daha da çətinləşdirir. Yaşlıların məsləhət və tənqidi gənclər tərəfindən dəstək kimi deyil, bəzən hücum kimi qəbul edilir. Bu isə nəsillər arasında müdafiə mövqeyinin güclənməsinə və qarşılıqlı anlaşmanın zəifləməsinə səbəb olur.
Samir
