Çiy ətin dondurucuda saxlanılması onun uzun müddət xarab olmasının qarşısını alsa da, bu, məhsulun keyfiyyətinin sonsuza qədər qorunacağı anlamına gəlmir.

HİT.az xəbər verir ki, dondurulmuş ət aşağı temperatur səbəbindən qida zəhərlənməsinə səbəb olan mikroorqanizmlərin inkişafını dayandırır. Lakin uzun müddət dondurucuda qalan ətin dadı, qoxusu və teksturası əhəmiyyətli dərəcədə dəyişə bilər.

Mütəxəssislərin məlumatına görə, ətin tərkibindəki yağ zaman keçdikcə, xüsusilə məhsul hava ilə təmas edirsə, acılaşa bilər. Bundan başqa, dondurma zamanı yaranan buz kristalları ətin hüceyrələrinə təsir göstərir və onun qurumasına səbəb olur. Nəticədə məhsul sərtləşə və rezinəbənzər tekstura ala bilər.

Ətin üzərində yaranan "dondurucu yanığı" da onun keyfiyyətinin aşağı düşdüyünü göstərir. Belə məhsul texniki baxımdan təhlükəsiz hesab oluna bilər, lakin əvvəlki dad və görünüşünü itirir.

Çiy ətin dondurucuda saxlanma müddəti məhsulun növündən asılıdır. Donuz əti 4-6 ay, təzə mal əti 6-12 ay, quzu əti 6-9 ay, toyuq və digər quş əti hissələri 9 ay, bütöv toyuq və hinduşka isə 12 aya qədər saxlanıla bilər.

Farş və hamburger üçün tövsiyə olunan müddət 3-4 ay, kolbasa və sosislər üçün 1-2 ay, bekon üçün isə cəmi 1 aydır. Yağlı balıqların 2-3 ay, yağsız və ağ balıqların 4-8 ay, krevet və xərçəngkimilərin isə 6-18 ay ərzində istifadə olunması məsləhət görülür.

Ətin keyfiyyətini mümkün qədər uzun müddət qorumaq üçün onu alındıqdan sonra gecikdirmədən dondurmaq lazımdır. Məhsulun üzərinə əlavə qida plyonkası və ya folqa çəkmək, daha sonra hava keçirməyən dondurucu paketinə yerləşdirmək tövsiyə olunur. Paketin üzərinə dondurulduğu ay və ili qeyd etmək də məhsulun nə qədər müddətdir saxlanıldığını izləməyə imkan verir.

Samir