Bir çox insan unu mağazadan aldığı kağız qablaşdırmada saxlayır. Lakin mütəxəssislər bunun məhsulun keyfiyyətinə və saxlanma müddətinə mənfi təsir göstərə biləcəyini bildirirlər.

HİT.az xəbər verir ki, unun kağız paketdə saxlanması onu müxtəlif anbar zərərvericilərindən və nəmdən kifayət qədər qorumur. Un güvəsi, uzunburun böcəklər, un böcəkləri və un gənələri kimi həşəratlar qablaşdırmadakı kiçik boşluqlardan içəri keçərək məhsulu yararsız hala sala bilər.

Mütəxəssislərin fikrincə, bağlanmış kağız paket belə unun zərərvericilərdən qorunmasına zəmanət vermir. Belə həşəratlar una yayıldıqda məhsulu istifadə etmək əvəzinə atmaq tövsiyə olunur. Üstəlik, zərərvericilər digər ərzaqlara, o cümlədən düyü və müxtəlif yarma məhsullarına da keçə bilər.

Un üçün digər təhlükə isə nəmdir. Kağız qablaşdırma suya davamlı olmadığından mətbəxdə tökülən su və ya digər mayelər unun tez xarab olmasına, hətta kiflənməsinə səbəb ola bilər.

Bunun qarşısını almaq üçün unu evə gətirdikdən sonra hava keçirməyən, suya davamlı qaba tökmək məsləhətdir. Qabın qapağı möhkəm bağlanmalı və məhsul istilik və günəş işığından uzaq yerdə saxlanmalıdır.

Unun təzəliyinə də diqqət yetirmək vacibdir. Müvafiq şəraitdə saxlanmadıqda zamanla məhsulun tərkibindəki təbii yağlar oksidləşərək onun dad və qoxusunun dəyişməsinə səbəb ola bilər. Ümumilikdə, unun saxlanma müddəti təxminən bir il hesab olunur.

Mətbəx çox isti olarsa, unu soyuducuda və ya dondurucuda saxlamaq da mümkündür. Bu üsul xüsusilə uzun müddət istifadə edilməyəcək unun təzəliyini qorumağa kömək edə bilər.

Beləliklə, unu kağız paketdə uzun müddət saxlamaq əvəzinə, onu möhkəm qapaqlı hermetik qabda saxlamaq həm nəmdən, həm də zərərvericilərdən qorunmaq üçün daha etibarlı üsuldur.

Samir