Ailə münasibətlərində emosional uzaqlaşma hər zaman ciddi mübahisələr və ya boşanma barədə açıq söhbətlərlə başlamır. Bəzən tərəflərdən biri daha az danışır, fiziki yaxınlıqdan qaçır, gündəlik qayğı göstərməyi dayandırır və gələcək planlarını həyat yoldaşını nəzərə almadan qurmağa başlayır.

HİT.az xəbər verir ki, “Psychology Today” nəşri münasibətlər üzrə mütəxəssislərin fikirlərinə əsaslanaraq, həyat yoldaşının evlilikdən emosional olaraq uzaqlaşdığını göstərə biləcək yeddi əlaməti açıqlayıb.

1. Ünsiyyət azalır

Emosional uzaqlaşmanın ilk əlamətlərindən biri şəxsi söhbətlərin azalmasıdır. Tərəfdaş gündəlik məişət məsələlərini müzakirə etsə də, işdə baş verənlərdən, şəxsi narahatlıqlarından və hisslərindən danışmaq istəməyə bilər. Münasibətlərdəki problemləri müzakirə etməkdən və onların həlli üçün səy göstərməkdən yayınmaq da diqqət yetirilməli məqamlardandır.

2. Bədən dili dəyişir

Əvvəllər qucaqlaşmağa, əl-ələ tutmağa və fiziki yaxınlığa təşəbbüs göstərən insan sonradan bu davranışlardan qaça bilər. Toxunuşlardan narahat olmaq və intim münasibətlərə marağın azalması da emosional məsafənin mümkün göstəriciləri sırasındadır. Bununla belə, bu dəyişikliklər yorğunluq və ya digər şəxsi səbəblərlə də bağlı ola bilər.

3. Gündəlik qayğı azalır

Sevdiyin insana qəhvə hazırlamaq, onun üçün yemək saxlamaq və ya evə qayıdanda rahatlığını düşünmək münasibətlərdə qayğının kiçik təzahürləridir. Əvvəllər bu cür diqqət göstərən tərəfdaşın sonradan qarşı tərəfin ehtiyaclarına laqeyd yanaşması münasibətlərdə dəyişiklikdən xəbər verə bilər. Lakin belə davranışın səbəbi iş yükü, yorğunluq və digər amillər də ola bilər.

4. Xarici görünüşündə qəfil dəyişikliklər edir

Yeni geyimlər, fərqli saç düzümü və görünüşə daha çox diqqət yetirmək bəzən tərəfdaşın diqqətini çəkə bilər. Ancaq bu dəyişikliklər özlüyündə xəyanətə və ya evlilikdən narazılığa dəlalət etmir. Əgər görünüşdəki yeniliklərlə yanaşı, ünsiyyət azalır və birlikdə vaxt keçirməyə maraq itirsə, münasibətlərdə baş verənləri açıq şəkildə müzakirə etmək faydalı ola bilər.

5. Planları barədə məlumat vermir

Həyat yoldaşlarının gündəlik planlarını bir-biri ilə bölüşməsi qarşılıqlı etimadı və birlik hissini gücləndirir. Tərəfdaşın hara getdiyini, nə vaxt qayıdacağını bildirməməsi və qərar qəbul edərkən digər şəxsin hisslərini nəzərə almaması uzaqlaşma əlaməti ola bilər. Digər tərəfdən, planlarını həddindən artıq təfərrüatla izah etməsi də suallar yarada bilər. Bununla belə, bu davranışların heç biri təkbaşına yalan danışmağın sübutu deyil.

6. Daha müstəqil olmağa çalışır

Şəxsi müstəqillik sağlam münasibətlər üçün də vacibdir. Lakin tərəfdaşın maliyyə məsələlərində qəfil ayrılığa getməsi, böyük alışlarla bağlı qərarları təkbaşına verməsi və gələcəyini planlaşdırarkən həyat yoldaşını nəzərə almaması münasibətlərdə məsafənin artdığını göstərə bilər. Əsas problem müstəqillik deyil, mühüm qərarların qarşılıqlı müzakirə edilməməsidir.

7. Evlilikdə xoşbəxt olmadığını dilə gətirir

Bəzi insanlar münasibətlərdən narazılıqlarını birbaşa ifadə etməkdə çətinlik çəkirlər. Bunun əvəzinə özlərini bədbəxt hiss etdiklərini, həyatlarında dəyişiklik istədiklərini və ya münasibətlərin gələcəyi barədə əmin olmadıqlarını bildirə bilərlər. “Səncə, son vaxtlar münasibətlərimiz necədir?” kimi suallar da ciddi söhbətə başlamaq cəhdi ola bilər.

Belə hallarda söhbətdən yayınmaq əvəzinə, tərəfdaşın narahatlığını anlamağa çalışmaq, onu diqqətlə dinləmək və öz hisslərini dürüst şəkildə bölüşmək vacibdir.

Samir