Uşaqlar nənə və babaları ilə bağlı xatirələrində bahalı hədiyyələrdən daha çox sevgi, diqqət və qayğı ilə dolu anları saxlayırlar. Psixoloqların fikrincə, ailə ənənələri, birgə keçirilən vaxt və özlərini təhlükəsiz hiss etmələri uşaqların yaddaşında uzun illər qalır.

HİT.az xəbər verir ki, bu barədə “Parade” nəşri psixoloqların fikirlərinə istinadən yazıb.

Mütəxəssislər bildirirlər ki, uşaqlar yaxınları ilə yaşadıqları hadisələrdən çox, həmin anlarda hansı hissləri keçirdiklərini xatırlayırlar. Nənə və babanın uşağa səmimi maraq göstərməsi, onu diqqətlə dinləməsi, uğurlarına sevinməsi və hər vəziyyətdə qəbul etməsi onunla bağlı isti xatirələrin formalaşmasına kömək edir.

Psixoloqların sözlərinə görə, nənənin bişirdiyi yeməyin qoxusu, birlikdə oynanılan oyunlar, ailədaxili zarafatlar və keçmişdən danışılan hekayələr də yaddaşda dərin iz buraxa bilər. Ailə tarixini əks etdirən söhbətlər uşaqlara öz köklərini tanımağa və ailənin bir parçası olduqlarını hiss etməyə imkan verir.

Uşağın ad günündə, məzuniyyət mərasimində və digər əlamətdar günlərdə nənə və babanın yanında olması da xüsusi əhəmiyyət daşıyır. Belə anlarda uşaq özünün dəyərli olduğunu və yaxınlarının onun sevincini bölüşdüyünü hiss edir.

Mütəxəssislər vurğulayırlar ki, bahalı hədiyyələr zamanla unudula bilər, lakin sevgi, diqqət və birlikdə yaşanan xoş anlar uzun illər yadda qalır. Buna görə də uşaqlarla münasibətdə əsas məsələ onlara nə qədər hədiyyə almaq deyil, birlikdə nə qədər səmimi və mənalı vaxt keçirməkdir.

Samir