Omeqa-3 yağ turşuları beyin fəaliyyətinin dəstəklənməsində, iltihab proseslərinin tənzimlənməsində və hormonal balansın qorunmasında mühüm rol oynayır. Dietoloqlar bildirirlər ki, bu faydalı maddələri yalnız qızılbalıqdan deyil, müxtəlif toxum və çərəzlərdən də əldə etmək mümkündür.

HİT.az xəbər verir ki, bu barədə “Real Simple” nəşri məlumat yayıb.

Mütəxəssislərin diqqət çəkdiyi məhsullar arasında skumbriya, çia toxumu, kətan toxumu, çətənə toxumu və qoz var. Məlumata görə, 85 qram qızılbalıq təxminən 1,8 qram omeqa-3 ehtiva edir.

Omeqa-3 ilə zəngin 5 məhsul:

1. Skumbriya

100 qram skumbriyada təxminən 2,6 qram omeqa-3 var. Bu balıq həmçinin zülal, kalsium və dəmir mənbəyidir.

2. Çia toxumu

İki xörək qaşığı çia toxumunda təxminən 5 qram omeqa-3 mövcuddur. Məhsul lif, kalsium və antioksidantlarla da zəngindir. Bu xüsusiyyətlər həzm sisteminin sağlamlığının və qan şəkərinin normal səviyyədə saxlanmasının dəstəklənməsinə kömək edir.

3. Kətan toxumu

İki xörək qaşığı kətan toxumu təxminən 3,6 qram omeqa-3 ehtiva edir. Bundan əlavə, bu toxum lif və zülal baxımından da zəngindir və müxtəlif yeməklərə əlavə edilə bilər.

4. Çətənə toxumu

Təxminən 42,5 qram çətənə toxumunda 2,6 qram omeqa-3 var. Bu məhsul həmçinin zülal, antioksidantlar və A, D, E vitaminlərini ehtiva edir.

5. Qoz

28 qram qoz təxminən 2,5 qram omeqa-3 ilə təmin edir. Qozun tərkibində maqnezium, melatonin və iltihabəleyhinə xüsusiyyətləri ilə tanınan polifenollar da mövcuddur.

Qeyd edək ki, bitki mənşəli məhsullarda əsasən alfa-linolen turşusu (ALA), balıqlarda isə eikosapentaen (EPA) və dokosaheksaen (DHA) yağ turşuları olur. Orqanizm ALA-nı EPA və DHA-ya məhdud miqdarda çevirir. Buna görə də bu məhsullar omeqa-3 mənbəyi olsalar da, qida dəyəri baxımından tam eyni hesab edilmirlər.

Samir