İtaliya kəndlilərinin süfrəsindən gələn polenta bu gün də Avropanın bir çox ölkəsində sevilən yeməklərdən biridir. Qarğıdalı unundan hazırlanan bu sadə və ucuz təam həm doyumlu olması, həm də tərkibindəki liflərlə diqqət çəkir.

HİT.az-ın məlumatına görə, “Blikk” nəşri polentanı bağırsaqların fəaliyyətinə müsbət təsir göstərə bilən yeməklərdən biri kimi təqdim edib. Bildirilir ki, onun tərkibindəki lif həzm prosesini dəstəkləyir və bağırsaqların fəaliyyətinin tənzimlənməsinə kömək edir.

Polenta necə hazırlanır?

Bir porsiya polenta hazırlamaq üçün iki stəkan su qaynadılır. Suya bir çay qaşığı duz və bir çay qaşığı yağ əlavə edilir. Daha sonra qaynayan suya iki yarım xörək qaşığı qarğıdalı unu tökülür. Qarışıq zəif odda 2-3 dəqiqə davamlı qarışdırılır. Beləliklə, yemək hazır olur.

Polentanı müxtəlif əlavələrlə də təqdim etmək mümkündür. Üzərinə rəndələnmiş pendir, toxumlar, tərəvəzlər və ya sevilən souslar əlavə edilə bilər.

İtaliyadan dünyaya yayılan yemək

Polenta əvvəllər İtaliyanın kənd yerlərində yaşayan aztəminatlı ailələrin əsas qidalarından biri olub. Əlçatan ərzaqlardan hazırlanması, doyumlu və sadə olması onun geniş yayılmasına səbəb olub. Zaman keçdikcə bu ənənəvi yemək Avropanın müxtəlif mətbəxlərinə daxil olub, hazırda hətta dəbdəbəli restoranların menyularında da yer alır.

Nəşr polentanın həftədə ən azı bir dəfə qida rasionuna daxil edilməsini tövsiyə edir. Bununla belə, onun həzm sisteminə təsiri fərdi xüsusiyyətlərdən və ümumi qidalanma rejimindən asılıdır.

Samir