Demək olar ki, hər mətbəxdə istifadə olunan dəfnə yarpağı təkcə yeməklərə verdiyi ətirlə deyil, qida tərkibi ilə də diqqət çəkir. Bu ədviyyat kalsiumla zənginliyi baxımından süd və qatığı belə geridə qoyur.
HİT.az xəbər verir ki, 100 qram dəfnə yarpağının tərkibində təxminən 834 milliqram kalsium var. Müqayisə üçün qeyd edək ki, eyni miqdarda süd və ya qatıqda bu mineralın miqdarı təxminən 120 milliqram təşkil edir.
Dəfnə yarpağı yalnız kalsium mənbəyi deyil. Onun tərkibində kalium, fosfor, maqnezium, dəmir, manqan, A və C vitaminləri, eləcə də B qrupu vitaminləri mövcuddur. Bundan əlavə, bu ədviyyat antioksidant xüsusiyyətlərə malik polifenollar, flavonoidlər və efir yağları ilə də zəngindir.
Mütəxəssislərin diqqət çəkdiyi məqamlardan biri də dəfnə yarpağının orqanizmə mümkün faydalarıdır. Tərkibindəki minerallar əzələ və sinir sisteminin normal fəaliyyətində, kalsium isə sümük və dişlərin möhkəmliyinin qorunmasında iştirak edir. A vitamini göz və dəri sağlamlığı, C vitamini isə immun sisteminin fəaliyyəti üçün əhəmiyyətlidir. Dəmir qırmızı qan hüceyrələrinin yaranmasında mühüm rol oynayır. Dəfnə yarpağından həzm prosesini dəstəkləmək məqsədilə də istifadə olunur.
Dəfnə yarpağından necə istifadə etmək olar?
Bu ədviyyatı gündəlik qidalanmaya daxil etmək olduqca asandır. Qurudulmuş yarpaqlar şorbalara, bulyonlara, souslara, ət və tərəvəz yeməklərinə bişirilmə zamanı əlavə edilə bilər. Həmçinin bir neçə dəfnə yarpağının üzərinə qaynar su tökərək 10-15 dəqiqə dəmləməklə ətirli içki hazırlamaq mümkündür.
Bununla belə, 100 qram məhsulun tərkibindəki yüksək kalsium göstəricisi adi istifadə zamanı orqanizmin həmin miqdarda mineral qəbul etməsi demək deyil. Dəfnə yarpağı yeməklərə az miqdarda əlavə olunduğundan süd və digər kalsium mənbələrini əvəz edə bilməz.
İstifadə zamanı nələrə diqqət edilməlidir?
Dəfnə yarpağını bütöv şəkildə yemək olmaz. Onun sərt quruluşu və iti kənarları boğulma, eləcə də həzm sisteminin zədələnməsi riski yarada bilər. Buna görə yemək süfrəyə verilməzdən əvvəl yarpaqlar çıxarılmalıdır.
Dəfnə yarpağından hazırlanan dəmləmələrin həddindən artıq qəbulu da həzm pozuntularına səbəb ola bilər. Hamilə və süd verən qadınlara, bu ədviyyata qarşı allergiyası olan şəxslərə, eləcə də qan şəkərini aşağı salan dərmanlardan istifadə edənlərə ehtiyatlı olmaq tövsiyə edilir.
Samir
