Münasibətlər üzrə uzun illik təcrübəyə malik kouç Emi Çan tanışlıq tətbiqlərindən istifadə etmədən yeni insanlarla tanış olmağın yollarını açıqlayıb. 

HİT.AZ CNBC-yə istinadən xəbər verir ki, bir çox insan bu platformalardan istifadənin yaratdığı yorğunluq səbəbindən alternativ yollar axtarır.

Qeyd edək ki, "Forbes Health" jurnalının 2025-ci ildə keçirdiyi sorğuya əsasən, insanların 78 faizi tanışlıq tətbiqlərinə görə ən azı bəzən, bir çoxu isə tez-tez və ya daim emosional, psixoloji, hətta fiziki yorğunluq hiss edir.

"Bir çox insan sadəcə tanışlıq tətbiqlərindən yorulub", deyə Çan bildirib.

Yeni tanışlıqlar arzulayan, lakin bu platformalardan istifadə etmək istəməyən insanlara ekspert aşağıdakı tövsiyələri verib:

Ortaq maraqların tanışlıq üçün vasitə olmasına imkan verin

Xüsusilə yay aylarında insanlar daha çox evdən çıxmaq və sosial mühitdə vaxt keçirmək istəyərkən, ekspert öz maraq və hobbilərindən istifadə etməyi məsləhət görür.

Bu, idman klubu, keramika kimi yaradıcılıq kursları və ya zövq aldığınız istənilən başqa fəaliyyət ola bilər. Belə məkanlara müntəzəm getdikdə eyni insanlarla daha tez-tez qarşılaşmaq mümkündür. Adi ünsiyyət isə zamanla simpatiyaya və ya daha yaxın münasibətə çevrilə bilər.

Emi Çan izah edib ki, bu vəziyyət "sadə tanışlıq effekti" ilə bağlıdır: insan həyatımızda nə qədər tez-tez görünürsə, ona qarşı müsbət münasibət yaranma ehtimalı bir o qədər artır.

Onun sözlərinə görə, bəzən insan beyninə yeni tanışa qarşı yaranan hisslərin dostluq, yoxsa romantik maraq olduğunu anlamaq üçün vaxt lazımdır. Buna görə də təbii mühitdə canlı ünsiyyət münasibətlərin inkişafı üçün tanışlıq tətbiqlərindən daha çox imkan yarada bilər.

Özünü inkişaf etdirmək istəyən insanlarla əhatə olunun

Çan həmçinin şəxsi maraqlarla bağlı tədbirlər və icmalar axtarmağı tövsiyə edib. Bunun üçün "Meetup" və "Luma" kimi xüsusi xidmətlərdən istifadə etmək və ya internetdə tematik klublar, kurslar və görüşlər tapmaq mümkündür.

Ekspertin fikrincə, inkişaf yönümlü insanların toplandığı retritlər də yaxşı seçim ola bilər. Belə tədbirlərdə adətən öyrənmək, inkişaf etmək və öz üzərində işləmək istəyən insanlar iştirak edir.

Lakin bu cür tədbirlərə yalnız gələcək həyat yoldaşını tapmaq məqsədi ilə getmək məsləhət görülmür. Daha faydalı yanaşma onları ünsiyyət dairəsini genişləndirmək, yeni insanlarla tanış olmaq və yeni təcrübələr qazanmaq imkanı kimi qəbul etməkdir.

Bu yanaşma təzyiqi azaltmağa, daha rahat olmağa və həyatdan daha çox zövq almağa kömək edir.

Samir