Şimali Koreya Ukraynaya qarşı müharibədə Rusiyaya göndərilən artilleriya sursatlarının istehsalını kəskin artırdığını açıqlayıb. Pxenyan iddia edir ki, hazırkı istehsal həcmi ölkə tarixində ən yüksək göstəricidir.
HİT.az xəbər verir ki, bu barədə Koreya Mərkəzi Teleqraf Agentliyi (“KCNA”) Şimali Koreya lideri Kim Çen Inın müdafiə sənayesi müəssisələrindən birinə səfərindən sonra məlumat yayıb.
Şimali Koreya təbliğatı bildirir ki, zavod əvvəlki rekord göstəricini iki dəfə üstələyib və hazırkı istehsal orta səviyyədən dörd dəfə çoxdur. Pxenyan həmçinin müdafiə sənayesi müəssisələrinin genişmiqyaslı modernizasiya olunduğunu və hərbi sənaye kompleksinin sürətlə inkişaf etdiyini iddia edir.
Ekspertlər isə qeyd edirlər ki, Şimali Koreyanın rəsmi açıqlamalarına ehtiyatla yanaşmaq lazımdır, çünki söhbət dövlət təbliğatından gedir. Bununla belə, Şimali Koreyanın Rusiyaya silah göndərməsi Qərb və Ukrayna mənbələri tərəfindən də təsdiqlənir.
Məlumata görə, 2023-cü ilin sentyabrından 2025-ci ilin aprelinə qədər Şimali Koreya Rusiyaya 1 milyondan 6 milyona qədər mərmi və raket ötürə bilər. Analitiklər bildirirlər ki, tədarükün bir hissəsi mövcud ehtiyatlardan həyata keçirilsə də, Pxenyan paralel olaraq öz hərbi-sənaye kompleksinin imkanlarını genişləndirir.
Mütəxəssislər vurğulayırlar ki, “sursat” anlayışına yalnız artilleriya mərmiləri deyil, həmçinin minaatan mərmiləri, reaktiv yaylım atəş sistemləri üçün raketlər və digər silah növləri də daxil ola bilər. Şimali Koreyanın müdafiə sənayesinin real imkanları tam məlum olmasa da, qiymətləndirmələrə görə ölkədə təxminən 300 müdafiə zavodu fəaliyyət göstərir və bu sektorda yarım milyona yaxın insan çalışır.
Şimali Koreyanın Rusiyaya artilleriya sistemləri və raket silahları da göndərdiyi bildirilir. Bunlara “M-1989” özüyeriyən artilleriya qurğuları, reaktiv yaylım atəş sistemləri, ballistik raketlər və tank əleyhinə raket kompleksləri daxildir.
Mediada yayılan məlumatlara görə, Rusiyanın Ukraynaya qarşı istifadə etdiyi “KN-23” və “KN-24” raketləri köhnə sovet texnologiyalarına əsaslanan, təxminən 50 il əvvəlki metodlarla hazırlanıb.
Samir
