Avropa İttifaqı Rusiyaya qarşı növbəti sanksiya paketini hazırlayır və əsas hədəf “kölgə donanması” kimi tanınan, Rusiya neftini dünya bazarlarına daşıyan tankerlər olacaq. 

HİT.az xəbər verir ki, “Politico”ya danışan Aİ rəsmilərinə görə, bu addım Kremlin əsas gəlir mənbələrindən birini zəiflətmək və Vladimir Putini Ukrayna ilə bağlı sülh danışıqlarında maksimalist tələblərdən geri çəkilməyə məcbur etmək məqsədi daşıyır.

Məlumata əsasən, 21-ci sanksiya paketi iyunun sonu və ya iyulun əvvəlində qəbul edilə bilər. Paket çərçivəsində Rusiya bankları, maliyyə institutları və hərbi-sənaye kompleksinə aid şirkətlər, həmçinin Ukraynadan oğurlanmış taxılın satışında iştirak edən firmalar da hədəfə alınacaq.

Aİ rəsmiləri əvvəllər Macarıstanın sabiq baş naziri Viktor Orban tərəfindən bloklanan bəzi tədbirlərin də yenidən gündəmə gətirildiyini bildirirlər. Bunlara Rusiya Pravoslav Kilsəsinin yüksək rütbəli nümayəndələrinə, o cümlədən patriarx Kirilə qarşı sanksiyalar daxildir. Eyni zamanda, Rusiya gəmilərinə dəniz daşımalarının qadağan edilməsi ideyasının da müzakirəyə çıxarıla biləcəyi qeyd olunur.

Brüsseldə hesab edilir ki, Rusiya iqtisadiyyatı müharibə dövründən bəri ən ağır vəziyyətdədir. Aİ rəsmilərindən birinin sözlərinə görə, hazırkı mərhələ təzyiqi artırmaq üçün “ən uyğun vaxtdır”.

Aİ-nin iqtisadi müşaviri Valdis Dombrovskis bildirib ki, Rusiya “statik inflyasiya şoku” ilə üz-üzədir və buna görə də G7 və ABŞ ilə danışıqlarda təzyiqin azaldılmaması vurğulanır.

Rəsmilər həmçinin Ukraynanın mövqeyinin gücləndiyini iddia edirlər. Aİ-nin 90 milyard avroluq kredit paketi, döyüş meydanında əldə olunan nəticələr və uzaqmənzilli silah istehsalının artması Kiyevin əlini gücləndirən əsas amillər kimi göstərilir.

Aİ daxilində bəzi diplomatlar hesab edirlər ki, yay aylarında yeni sanksiya dalğası həm də mümkün sülh prosesinə təkan verə bilər. Burada ABŞ-dakı siyasi proseslər və digər regional gərginliklərin də təsir göstərə biləcəyi qeyd olunur.

Fəaliyyətdə olan bəzi rəsmilər isə bildirirlər ki, Ukraynanın döyüş meydanındakı uğurları danışıqlar mövqelərinin dəyişməsinə səbəb ola bilər və bu, Moskvanın mövqeyinə əlavə təzyiq yaradır.

Aİ artıq 20-ci sanksiya paketini təsdiqləyib. Həmin paketə Rusiya neft emalı zavodları, enerji şirkətləri və “kölgə donanması” ilə əlaqəli strukturlar daxil edilib. Eyni zamanda, bəzi məhsulların Rusiyaya dolayı ixracının qarşısını almaq üçün Mərkəzi Asiya ölkələrinə qarşı da məhdudiyyətlər tətbiq olunub.

Samir