Rusiya hökuməti iqtisadi tənəzzüldən yayınmağa çalışır, lakin sürətli artım gözləmir – 2026-cı il üçün ÜDM artım proqnozu üç dəfə azaldılıb.
HİT.az xəbər verir ki, bu “The Moscow Times” yazır.
Rusiya baş nazirinin müavini Aleksandr Novak yenilənmiş proqnozu açıqlayaraq bildirib: “2026-cı ildə ÜDM üzrə müsbət dinamikanı +0,4% səviyyəsində saxlamaq mümkün olacaq”.
Bu, əvvəlki 1,3% artım proqnozu ilə müqayisədə ciddi azalmadır.
Nəşrin yazdığına görə, bu qədər zəif gözləntilər gözlənilməz olub. 2026-cı ilin ilk rübündə ÜDM 0,3% azalıb və Vladimir Putin hökumət və Mərkəzi Bankdan iqtisadi artımı sürətləndirməyi tələb edib.
Novakın sözlərinə görə, proqnoz “konservativ” şərtlərə əsaslanır. Buraya Rusiyanın neftinin orta qiymətinin 2026-cı ildə bir barel üçün 59 dollar, növbəti illərdə isə 50 dollar olması daxildir. Bu göstərici hətta Mərkəzi Bankın proqnozundan da aşağıdır. Bank aprel ayında bu il üçün 65 dollar, 2027–2028-ci illər üçün isə 55 dollar proqnozlaşdırmışdı.
Aşağı neft qiymətləri büdcə xərclərinin məhdudlaşdırılmasına kömək edəcək. Novakın izahına görə, gəlirlər azaldıqda (əsasən güclü rubl və aşağı neft qiymətləri səbəbindən), xərclər, o cümlədən hərbi xərclər artır. Proqnozda göstərilən aşağı neft qiyməti daha az neft-qaz gəliri deməkdir, artıq gəlirlər isə Rusiya Milli Rifah Fonduna yönəldiləcək.
Bu proqnoz iqtisadiyyat üçün çətin il vəd edir. Gözlənilir ki, investisiya azalması davam edəcək, inflyasiya 5,2% səviyyəsində yüksək qalacaq, əhalinin gəlirlərinin artımı 2025-ci ildəki 7,7%-dən sonra 1,6%-ə enəcək, istehlak aktivliyi isə 4%-dən sonra 1,2%-ə düşəcək. İşsizlik 2,3–2,4% səviyyəsinə yüksələcək.
Gözlənilir ki, sonrakı illərdə iqtisadiyyat uyğunlaşacaq, Rusiya Mərkəzi Bankı uçot dərəcəsini azaldacaq və ÜDM artımı 2027-ci ildə 1,4%, 2029-cu ildə isə 2,4%-ə yüksələcək.
Samir
