Qətərin ABŞ-a hədiyyə etdiyi yeni "Air Force One" təyyarəsi artıq dünyanın ən çox müzakirə olunan prezident təyyarələrindən birinə çevrilib. Lüks "Boeing 747-8" o qədər böyük və ağırdır ki, Türkiyə onun NATO sammiti zamanı enə bilməsi üçün hərbi uçuş-enmə zolağının yenidən qurulmasına 120 milyon dollardan çox vəsait və səkkiz ay vaxt sərf edib.
HİT.az xəbər verir ki, bu barədə "Luxurylaunches" yazır.
Prezident təyyarəsi əvvəlcə Qətər kral ailəsi üçün hazırlanmış "Boeing 747-8" modelinin VIP versiyası əsasında yaradılıb. "Boeing" şirkəti yeni "VC-25B" təyyarələrinin istehsalını başa çatdırana qədər məhz bu layner müvəqqəti "Air Force One" funksiyasını yerinə yetirəcək.
Ötən ay təyyarə ilk dəfə rəsmi şəkildə Endryus hərbi bazasında nümayiş etdirilib. Qısa müddət sonra prezident onunla Şimali Dakotaya ilk uçuşunu həyata keçirib. Bununla belə, salonun təqdimatı ciddi şəkildə məhdudlaşdırılıb: jurnalistlərə yalnız öz oturacaqlarını və təqdim olunan yeməkləri çəkməyə icazə verilib, salonun əksər görüntüləri isə Ağ Ev nümayəndələri tərəfindən yayımlanıb.
Təyyarənin xarici görünüşündə Qətərin kral rənglərindən fərqli olaraq yeni mavi-ağ-qırmızı-qızılı dizayn tətbiq edilib. O, hazırkı prezident təyyarələri olan "VC-25A" modellərindən təxminən altı metr uzun və demək olar ki, doqquz metr daha enlidir. Bu isə daha geniş salon yaratmağa imkan verib.
Təyyarənin interyeri daha çox lüks şəxsi təyyarəni və ya hökumət iqamətgahını xatırladır. Salonda krem rəngli dəri kreslolar, cilalanmış ağac, qızılı dekor elementləri və isti bej tonlarında bəzəklərdən istifadə olunub. Prezident möhürü təhlükəsizlik kəmərlərində, yastıqlarda və digər salon detalları üzərində yerləşdirilib. Divarlar isə ABŞ-ın məşhur görməli yerlərini əks etdirən rəsmlərlə bəzədilib.
Təyyarənin əsas bölmələrindən biri böyük dairəvi taxta masa və dəri kreslolarla təchiz olunmuş geniş konfrans zalıdır. Məhz burada uçuş zamanı diplomatik danışıqlar və işgüzar görüşlər keçirilə bilər.
Mətbuat zonası da daha rahat vəziyyətə gətirilib. Jurnalistlər tam açılan, masaj funksiyasına malik, fərdi enerji doldurma stansiyaları və kabel televiziyası, eləcə də "Apple TV" çıxışı olan multimedia sistemləri ilə təchiz edilmiş geniş dəri kreslolar əldə ediblər. İşçi heyəti və Gizli xidmət bölmələrinin yerləşdiyi sahə mətbuat kabinəsindən xüsusi arakəsmə ilə ayrılıb.
Təyyarədə yeməklərin təqdimatı da onun statusuna uyğunlaşdırılıb. Yeməklər üzərində prezident möhürü olan ağ-qızılı çini qablarda servis edilir, sərnişinlərə isə xüsusi prezident konfetləri "M&M's" və hədiyyə dəstləri təqdim olunur.
ABŞ hökumətinin istifadəsinə verilməzdən əvvəl bu "Boeing" 100-dən az sərnişin üçün nəzərdə tutulmuşdu və iki göyərtədə geniş istirahət zonaları, ayrıca ofislər və bir neçə görüş otağına malik idi. Ağ Ev yenidənqurmadan sonra bütün bölmələri nümayiş etdirməsə də, salonun miqyası aydın şəkildə görünür.
Gözlənilir ki, bu təyyarə yalnız müvəqqəti olaraq "Air Force One" kimi istifadə olunacaq və yeni "Boeing VC-25B" modelləri istismara veriləndən sonra xidmətdən çıxarılacaq. Daha sonra onun ABŞ prezident aviasiyası tarixində ən unikal təyyarələrdən biri kimi gələcək Prezident Kitabxanasına təhvil verilməsi planlaşdırılır.
Samir
