Yaponiyanın "Hoshino Resorts" kurort şirkəti tarixi həbsxananı 48 nömrəli lüks hotelə çevirib. 

HİT.az xəbər verir ki, "Business Insider" nəşrinin yazdığına görə, 1908-ci ildə inşa edilmiş və 2017-ci ildə Yaponiyanın mədəni irs abidəsi elan olunan keçmiş Nara həbsxanası bu ilin iyununda "Hoshinoya Nara Prison Hotel" adı ilə fəaliyyətə başlayıb.

"Hoshino Resorts"un yaydığı məlumata əsasən, kompleks mərkəzi nəzarət məntəqəsindən şüa formasında ayrılan beş həbs korpusundan ibarət ulduzşəkilli memarlıq quruluşuna malikdir. Ümumi sahəsi təxminən 25 akr olan kompleksə Nara Həbsxana Muzeyi də daxildir.

Hotelin baş meneceri Masaya Kakeqavanın sözlərinə görə, açıldığı gündən etibarən hotel xüsusilə xarici turistlər, memarlıq, tarix və mədəniyyətlə maraqlanan səyahətçilər arasında böyük maraq doğurur.

Hoteldə üç növ otaq mövcuddur. Ən böyük otaq olan "11-Cell Deluxe" qonaq otağı və qarderobla təchiz edilib. Bir gecəlik qiymətlər 245 ABŞ dollarından başlayır, lakin tariflər mövsümdən asılı olaraq dəyişə bilər.

Vaxtilə əsasən məhbusların əməyi ilə tikilmiş həbsxana kompleksi Roman üslubunda inşa edilmiş əsas giriş qapısı, iki mərtəbəli inzibati binası və onu əhatə edən divarları ilə seçilir. Yenidənqurma zamanı əl ilə hörülmüş kərpic divarlar və binanın orijinal tavan bəzəkləri də daxil olmaqla bir çox tarixi memarlıq elementi qorunub saxlanılıb.

Menecer bildirib ki, dəhlizlərdə də həbsxananın keçmişini əks etdirən yaşıl taxta kamera qapıları, müşahidə pəncərələri, havalandırma dəlikləri və otaq nömrələri olduğu kimi saxlanılıb. Dəhlizlərin yuxarı hissəsində isə orijinal dam pəncərələri və polad konstruksiyalar görünməkdə davam edir.

Onun sözlərinə görə, təxminən yeddi il davam edən yenidənqurma işlərinin ən böyük çətinliyi tarixi xüsusiyyətləri qorumaqla yanaşı, binanı lüks hotel standartlarına uyğun rahat məkana çevirmək olub.

"Keçmişini gizlətmək əvəzinə, qonaqların bu tarixi məkanı gəzərkən onu fiziki olaraq hiss etmələrini istədik", deyə Masaya Kakeqava bildirib.

Qeyd edək ki, keçmiş Nara həbsxanası "Netflix" platformasının məşhur Yapon serialı "Alice in Borderland"ın ikinci mövsümünün çəkiliş məkanlarından biri kimi də istifadə olunub.

Samir