Üç Afrika vəhşi iti səkkiz ay ərzində cütləşmək üçün dişi axtarışında təxminən 4 min kilometr yol qət edib. Bu, Afrikada quru məməlisinin qeydə alınmış ən uzun məsafəli köçüdür. Heyvanlar Zambiyanın demək olar ki, bütün ərazisini keçərək iri şəhərlərdən və insanların ciddi şəkildə dəyişdirdiyi digər ərazilərdən yan keçiblər. 

HİT.az xəbər verir ki, bu barədə BBC məlumat yayıb.

Kaftarabənzər itlər düz xətt üzrə təxminən 420 kilometr məsafə qət etsələr də, ərazinin xüsusiyyətləri səbəbindən onların faktiki marşrutu demək olar ki, 10 dəfə uzun olub. Heyvanlar Zambiyanın paytaxtı Lusaka və sənaye rayonları da daxil olmaqla müxtəlif maneələrdən yan keçərək daim istiqamətlərini dəyişiblər.

Tədqiqatçılar bu davranışı dispersiya – heyvanların cütlük və yeni yaşayış məkanı axtarışında doğma qrupundan ayrılaraq başqa ərazilərə köçməsi – adlandırırlar. Afrika vəhşi itləri üçün belə səyahətlər xüsusilə əhəmiyyətlidir. Belə ki, bir sürüdə bütün heyvanlar çoxala bilmir və buna görə də 2-3 yaşlı gənc fərdlər digər qrupları axtarmaq üçün yola çıxırlar.

Bu itlərin iki dişi həmcinsi də demək olar ki, eyni uzunluqda məsafə qət edib. Lakin dişilərdən birinin ov tələsinə düşməsindən sonra onların səyahəti başa çatıb.

Alimlər hesab edirlər ki, rekord məsafəli bu köç Afrikanın şərqində və cənubunda yaşayan Afrika vəhşi itlərinin populyasiyaları arasında daha sıx əlaqənin mövcudluğundan xəbər verə bilər. Montana Dövlət Universitetinin professoru Skott Krilin fikrincə, əgər populyasiyalar hasarlarla bir-birindən təcrid olunmayıbsa, potensial olaraq onların əksəriyyəti arasında heyvan mübadiləsi mümkündür.

Afrika vəhşi itləri qitənin ən nadir yırtıcılarından biridir. Mütəxəssislərin hesablamalarına görə, təbiətdə təxminən 6 min fərd qalıb. Bu heyvanlar sürülər halında yaşayır və birlikdə ov edirlər. Uzaq məsafələrə köç etmələri isə onlara yeni ərazilər və cütlüklər tapmağa imkan verir.

Bununla belə, alimlər qeyd edirlər ki, belə səyahətlər üçün yollar, şəhərlər, kənd təsərrüfatı əraziləri və ov tələləri təhlükə yaradır. Buna görə də itlərin minlərlə kilometr məsafə qət etmək qabiliyyəti öz-özlüyündə onların populyasiyalarının gələcəkdə maneəsiz şəkildə qorunub saxlanılacağı anlamına gəlmir.

Samir