Almaniya Müdafiə Nazirliyində Ukraynanın silah tələbatını qarşılayan və hərbi yardımın çatdırılmasını sürətləndirən məxfi bölmə fəaliyyət göstərir.
HİT.az xəbər verir ki, “Financial Times”ın məlumatına görə, "Sonderstab Ukraine" adlı xüsusi strukturda 20-dən az əməkdaş çalışır. Bölməyə “Tornado” qırıcı təyyarəsinin keçmiş pilotu, briqada generalı Yoahim Kaşke rəhbərlik edir. Komanda Almaniya Müdafiə Nazirliyinin yüksək məxfilik rejimli qanadlarından birində yerləşir.
Bölmə 2022-ci ildə Rusiyanın Ukraynaya qarşı genişmiqyaslı müharibəyə başlamasından bir neçə ay sonra yaradılıb. Əvvəlcə onun əsas vəzifəsi cəbhədəki vəziyyəti izləmək və Almaniya rəhbərliyini məlumatlandırmaq olub. Lakin qısa müddət sonra struktur Ukraynaya hansı hərbi yardımın göstərilə biləcəyini müəyyənləşdirən və silah tədarükünü təşkil edən xüsusi mexanizmə çevrilib.
Sonderstab Ukraine ənənəvi satınalma prosedurlarından daha çevik fəaliyyət göstərir. Ukrayna ordusu ehtiyac duyduğu silah sistemləri barədə məlumat verir, alman tərəfi isə uyğun avadanlığı taparaq maliyyələşdirir. FT yazır ki, bəzi hallarda silah tədarükü ilə bağlı müqavilələrin bağlanması cəmi iki həftə çəkir.
Bölmə həmçinin müxtəlif silahların döyüş meydanında effektivliyini təhlil edir. Bu məlumatlar sonrakı satınalmalarla bağlı qərarlara təsir göstərir. Alman hərbçiləri Ukraynanın real döyüş təcrübəsindən yararlanaraq hansı sistemlərin praktikada daha səmərəli olduğunu müəyyənləşdirməyə çalışırlar.
Almaniyanın yanaşmasına təsir edən nümunələrdən biri “Quantum Systems” şirkətinin istehsal etdiyi kəşfiyyat dronları olub. Ukraynaya verilən beş pilotsuz uçuş aparatı “Starlink” peyk rabitəsi sistemi ilə inteqrasiya edilərək artilleriya üçün hədəflərin müəyyənləşdirilməsində istifadə olunub. Alman tərəfi bu texnologiyanın Ukrayna ordusuna mühüm üstünlük verdiyini gördükdən sonra həmin dronların tədarükünü maliyyələşdirməyə başlayıb.
Sonderstab Ukraine-in ən mühüm nəticələrindən biri isə Ukrayna üçün ilk "IRIS-T" hava hücumundan müdafiə sisteminin maliyyələşdirilməsi olub. Almaniyanın “Diehl” şirkəti tərəfindən istehsal olunan bu sistem sonradan Ukraynanın hava hücumundan müdafiəsində ABŞ istehsalı “Patriot” kompleksləri ilə birlikdə əsas vasitələrdən birinə çevrilib.
Müharibə başlayandan sonra Berlinin Ukraynaya hərbi yardım siyasəti də əhəmiyyətli dərəcədə dəyişib. Əvvəllər döyüş bölgələrinə silah göndərməkdən çəkinən Almaniya əvvəlcə Bundesverin ehtiyatlarından tank əleyhinə və zenit sistemləri verib, daha sonra ağır silahların tədarükünə keçib. ABŞ-ın hərbi yardımını azaltmasından sonra Almaniya Ukraynanın əsas Avropa donoruna çevrilib. FT-nin məlumatına görə, Berlinin bu il Ukraynaya hərbi yardım üçün ayırdığı vəsait 11,5 milyard avro təşkil edir.
Hazırda Sonderstab Ukraine yalnız silah tədarükü ilə məşğul olmur. Bölmə Ukrayna və Almaniya hərbçiləri, eləcə də müdafiə sənayesi şirkətləri arasında əməkdaşlığın qurulmasına kömək edir. Berlin xüsusilə pilotsuz uçuş aparatlarının istifadəsi və onlara qarşı mübarizə sahəsində Ukraynanın döyüş təcrübəsini öyrənməyə çalışır.
Almaniya tərəfi Ukraynanın “Delta” sistemi vasitəsilə əldə olunan məlumatlardan da yararlanır. Bu platforma peyklərdən, sensorlardan, dronlardan və ələ keçirilmiş Rusiya rabitə məlumatlarından daxil olan informasiyanı birləşdirir.
Bununla yanaşı, Almaniya Ukraynada yeni silah növlərinin, o cümlədən Rusiyanın dərinliklərinə zərbə endirə bilən raketlərin istehsalını da dəstəkləyir. Lakin Ukrayna müdafiə şirkətlərinin Almaniyanın maliyyələşdirdiyi layihələrə cəlb olunması bəzi alman istehsalçıları arasında narahatlıq yaradıb.
Yoahim Kaşkenin sözlərinə görə, Sonderstab Ukraine-in əsas üstünlüyü sürətli qərarvermə imkanlarıdır. O bildirib ki, Ukrayna ordusu hər döyüşdən sonra taktikasını və texnologiyasını təkmilləşdirir, buna görə də Almaniyanın silah sistemləri bu sürətli inkişafa uyğunlaşmalıdır.
FT-nin məlumatına görə, Kaşke xüsusi bölməyə rəhbərlik etdiyi vaxtdan etibarən doqquz dəfə Ukraynaya səfər edib. Kiçik heyətə malik olmasına baxmayaraq, Sonderstab Ukraine Berlinin Ukrayna ordusunun ehtiyaclarına daha çevik reaksiya verməsində mühüm rol oynayır.
Samir
