2027-ci ildə Avropada turist izdihamından uzaq istirahət üçün 5 məkan

DÜNYA
18:59 / 17.11.2026
35

Avropanın məşhur turizm məkanlarında turist sıxlığı və qiymətlərin artması səyahətçiləri daha az tanınan istiqamətlər axtarmağa vadar edir. Ekspertlər 2027-ci ildə Komo gölü və Nitsa kimi populyar məkanlar əvəzinə Avropanın beş fərqli bölgəsinə səyahət etməyi tövsiyə edirlər.

HİT.az xəbər verir ki, bu istiqamətlər dünyanın ən böyük turizm nəşriyyatlarından biri olan “Lonely Planet”in mütəxəssisləri tərəfindən seçilib. Ümumilikdə 2027-ci il üçün hazırlanan siyahıda dünyanın müxtəlif bölgələrindən 12 istiqamət yer alıb. Onlardan beşi Avropadadır.

Nəşr qeyd edir ki, Santorini, Barselona və Amalfi sahilləri kimi məşhur məkanlar turist axınının həddindən artıq çoxluğu ilə üzləşir. Bu səbəbdən daha sakit, lakin təbiəti və tarixi baxımdan zəngin bölgələrə maraq artır.

1. Vandea, Fransa

Fransız Rivyerasına alternativ kimi göstərilən Vandea bölgəsi geniş çimərlikləri, qayalı sahilləri, adaları, balıqçı limanları və tarixi qalaları ilə seçilir. Burada velosiped və atçılıq marşrutları, duz gölləri və rəngarəng kəndlər də turistləri cəlb edir.

Mütəxəssislər dəniz məhsullarını sevənlərə bölgəni xüsusilə tövsiyə edirlər. Ən yaxşı səyahət vaxtı yay ayları, daha sakit istirahət üçün isə sentyabr hesab olunur.

2. Tbilisi, Gürcüstan

Gürcüstanın paytaxtı da 2027-ci ilin diqqətçəkən istiqamətləri arasındadır. Tbilisi turistlərə zəngin tarix, fərqli memarlıq, dağ marşrutları və şərabçılıq bölgələrinə yaxınlıq təklif edir.

Ekspertlər Gürcüstanı Qərbi Avropanın bahalı və izdihamlı turizm istiqamətlərinə alternativ hesab edirlər. Səyahət üçün yaydan payızın sonunadək olan dövr daha münasib sayılır.

3. Balaton gölü, Macarıstan

Macarıstanın ən böyük gölü olan Balaton Budapeştin kölgəsində qalsa da, yay istirahəti üçün əlverişli məkan hesab olunur.

Gölün sahilində yerləşən Şiofok əyləncə və musiqi festivalları, Tihany isə lavanda sahələri ilə tanınır. İstirahət üçün iyun-avqust ayları tövsiyə edilir. Yaxınlıqda yerləşən Heviz gölü də termal suları ilə diqqət çəkir.

4. Apuliya, İtaliya

İtaliyanın cənubunda yerləşən Apuliya bölgəsi gözəl çimərlikləri, zəngin mətbəxi və tarixi irsi ilə seçilir. Amalfi sahilləri və Çinkve-Terre ilə müqayisədə burada turist sıxlığı və istirahət xərcləri nisbətən aşağıdır.

Bölgəyə səyahət üçün aprel-iyun və sentyabr-oktyabr ayları daha münasib hesab olunur. Bu dövrdə həm hava şəraiti əlverişli olur, həm də yay mövsümünün izdihamından yayınmaq mümkündür.

5. Mərkəzi Uels, Böyük Britaniya

Uelsin mərkəzi hissəsi təbiət həvəskarları üçün maraqlı istiqamətdir. Burada toxunulmamış çimərliklər, qədim qala xarabalıqları, dağ mənzərələri və özünəməxsus Uels mədəniyyəti ilə tanış olmaq mümkündür.

Ekspertlər avtomobil icarəyə götürərək Pouis qraflığının kurort şəhərciklərindən keçməyi, Kembri dağlarını və Keredigion sahillərini gəzməyi tövsiyə edirlər. Səyahət üçün ən münasib dövr iyun-sentyabr aylarıdır.

Beləliklə, 2027-ci ildə Avropada daha sakit və fərqli istirahət axtaranlar üçün bu beş istiqamət məşhur turizm mərkəzlərinə alternativ ola bilər.

Samir

0