“Mercedes” əfsanəvi “SL” modelini köklərinə qaytarır - FOTOLAR

AVTO
17:00 / 16.11.2026
35

Almaniyanın lüks avtomobil istehsalçısı “Mercedes-Benz” hazırkı “R232” nəsil “SL” rodsterinin həddindən artıq idman yönümlü olması ilə bağlı müştərilərdən gələn rəyləri nəzərə alaraq modelin xarakterini dəyişmək qərarına gəlib. 

Hit.az xəbər verir ki, birbaşa “Mercedes-AMG” bölməsi tərəfindən hazırlanan və “AMG GT” ilə eyni texniki bazanı paylaşan mövcud nəslin sərt sürüşü bəzi alıcıları məmnun etsə də, uzun məsafəli səyahətlər üçün lüks və yumşaq avtomobil axtaran ənənəvi “SL” pərəstişkarlarının gözləntilərini tam qarşılamayıb.

Bu səbəbdən də şirkət orta dövr restaylinq əməliyyatından keçəcək yenilənmiş “Mercedes SL” modelinin 2027-ci ildə satışa çıxarılması planlaşdırılır. Şirkətin baş icraçı direktoru Ola Kallenius yeni modelin xarakterinə işarə edərək yenilənmiş rodsterin “daha çox bir Mercedes-Benz” olacağını rəsmi şəkildə təsdiqləyib. Üstəlik, avtomobil mətbuatının yaydığı məlumatlara görə, yenilənmə ilə birlikdə seriyaya “AMG” yerinə standart “Mercedes-Benz” loqosu daşıyan yeni baza versiyası əlavə olunacaq.

Qeyd edək ki, standart versiya “AMG” modellərinin xarakterik şaquli barmaqlıqlı “Panamericana” radiator qəfəsindən imtina edərək daha klassik və zərif “Mercedes-Benz” ön dizaynına sahib olacaq. Eyni zamanda, asqı sisteminin tənzimləmələri dəyişdirilərək daha yumşaq və sarsıntısız sürüş təmin ediləcək.

Bu dəyişikliklərlə yeni “SL” kəskin döngələri yüksək sürətlə qət edən idman avtomobilindən çox, uzun magistrallarda rahat və sakit səyahətlər üçün nəzərdə tutulmuş əsl “Gran Turismo” (GT) avtomobilinə çevriləcək.

Həmçinin, yenilənmiş model sırasının giriş səviyyəsində – yeni “SL 500 4Matic+” versiyası da daxil olmaqla – 3,0 litrlik turboşarjlı altısilindrli sıralı mühərrikdən istifadə ediləcəyi gözlənilir. Bu aqreqatın 443 at gücü hasil edəcəyi proqnozlaşdırılır. Bu göstərici mövcud “AMG SL 55 4Matic+” modelinin 469 at gücündən bir qədər aşağı olsa da, 2,0 litrlik dördsilindrli mühərriklə 375 at gücü təklif edən əvvəlki “AMG SL 43” versiyasını əhəmiyyətli dərəcədə üstələyir.

Bundan əlavə, yenilənmiş “SL” ailəsinin bütün versiyaları markanın yeni korporativ üslubuna uyğun olaraq üçguşəli ulduz formasında LED gündüz işıqları ilə təchiz ediləcək. Daha sərt idarəetmə və yüksək dinamika tələb edən müştərilər üçün isə brendin daha aqressiv xarakterli “Mercedes-AMG GT” kupe və güclü “AMG SL” versiyaları paralel olaraq təklif edilməyə davam edəcək.

Pərviz

0