Mənzili yeniləyərkən uzun illər peşmanlıq yarada biləcək səhvlərə yol vermək asandır. Xüsusilə büdcə məhdud, seçim isə çox olduqda. 

Hit.az xəbər verir ki, "Real Simple" nəşri interyer dizayneri Brittni Morqanla danışaraq ev sahiblərinin ən çox peşman olduğu yeddi seçimi və onların alternativlərini açıqlayıb.

Mütəxəssisin fikrincə, interyer seçimlərindəki səhvlərin əksəriyyəti ya qənaət etmək istəyindən, ya da yalnız vizual görünüşə fokuslanmaqdan qaynaqlanır. Buna görə o, məhsulları yalnız dizayna görə deyil, həm də davamlılıq, rahatlıq və gündəlik istifadə rahatlığına görə qiymətləndirməyi tövsiyə edir.

Ucuz divanlar

Dizaynerin sözlərinə görə, çox ucuz divanlar qısa müddətdə formasını itirir, rahatlığını itirir və tez dəyişdirilməli olur. O, quruluşu qurudulmuş ağacdan olan, keyfiyyətli dəstək sistemi və sıx doldurulmuş yastıqlara sahib modelləri seçməyi məsləhət görür. Bu cür mebellər daha uzunömürlü olur və əlavə xərclərin qarşısını alır.

Narahat yemək stulları

Ekspert bildirir ki, insanlar çox vaxt stulları yalnız görünüşünə görə seçir və nəticədə yemək zonası istifadə olunmaz hala gəlir. O, ergonomik, yumşaq oturacaqlı və bel dəstəyi olan modellərə üstünlük verməyi tövsiyə edir.

Mat qara qarışdırıcılar və avadanlıqlar

Belə santexnika dəbli görünsə də, daimi qulluq tələb edir. Üzərində barmaq izləri və su ləkələri tez görünür. Dizayner bunun əvəzinə mat qızılı və ya isti metal çalarlarını tövsiyə edir, çünki onlar daha uzun müddət səliqəli görünür.

Kiçik televizor altlıqları

Ən çox edilən səhvlərdən biri böyük televizor üçün kiçik altlıq seçməkdir. Bu, otaqda vizual balansı pozur. Altlıq televizordan geniş olmalı və hər iki tərəfdə boşluq qalmalıdır.

Ucuz markalı tozsoranlar

Qənaət məqsədilə alınan ucuz tozsoranlar tez sıradan çıxır və ya zəif işləyir. Mütəxəssis etibarlı brendlərə investisiya etməyi tövsiyə edir, çünki keyfiyyətli cihaz illərlə xidmət göstərir.

Həddindən artıq açıq rəflər

İnteryer fotolarında estetik görünsə də, real həyatda açıq rəflər ya boş, ya da qarışıq görünə bilər. Dizayner açıq və qapalı saxlama zonalarını birləşdirməyi məsləhət görür.

Ucuz “ağıllı” lampalar

Ucuz smart lampalar tez-tez telefon və ya “ağıllı ev” sistemləri ilə əlaqəni itirir və daimi yenidən qurulma tələb edir. Daha stabil işləmə üçün bir brendin ekosistemindən istifadə tövsiyə olunur.

Samir