Bir çox insan şimşək zamanı elektrik cihazlarını rozetkadan çıxarmağın vacib olub-olmadığını düşünür. 

HİT.az xəbər verir ki, "Komputerswiat.pl" nəşrinin yazdığına görə, mütəxəssislər bunun zəruri təhlükəsizlik tədbiri olduğunu bildirirlər.

"Skywarn Polska" ("Polşa Şimşək Ovçuları") assosiasiyasının rəhbəri Artur Surovetski qeyd edib ki, şimşək zamanı elektrik və elektron cihazların zədələnməsi, hətta tamamilə sıradan çıxması riski kifayət qədər yüksəkdir.

Onun sözlərinə görə, bəzi şimşək boşalmaları o qədər güclü olur ki, evdə ildırımdan mühafizə sistemi quraşdırılmış olsa belə, məişət texnikasını zədələyə bilər.

Ekspert izah edib ki, mənfi yüklü ildırım boşalması ildırımötürücü ilə təchiz olunmuş ev üçün adətən ciddi təhlükə yaratmır. Lakin müsbət yüklü ildırım boşalmaları daha güclü olduğundan, belə hallarda hətta gərginlik sıçrayışından qoruyan avtomatik qoruyucu sistemlər də kifayət etməyə bilər.

Bundan əlavə, güclü şimşək boşalması ətrafında yaranan intensiv elektromaqnit sahəsi evin elektrik naqillərində elektromaqnit induksiyasına səbəb olur. Nəticədə yaranan yüksək cərəyanlar elektrik cihazlarına ziyan vura bilər.

Mütəxəssisin sözlərinə görə, müsbət yüklü ildırımlar daha güclü səs-küylə müşayiət olunur, onların izi adətən düz olur, budaqlanmır və çox parlaq görünür. Belə ildırımlar zamanı eşidilən gurultu partlayış və ya top atəşini xatırladır.

Bu səbəbdən ekspertlər güclü şimşək zamanı, xüsusilə bahalı elektron avadanlıqları elektrik şəbəkəsindən ayırmağı ən təhlükəsiz seçim hesab edirlər. Bu sadə tədbir mümkün zədələrin qarşısını almağa kömək edə bilər.

Samir