Yeriyərkən başını aşağı salıb yola baxan insanları görənlərin çoxu bunu utancaqlıq, kədər və ya özünəinamın aşağı olması kimi qiymətləndirir. Lakin psixoloqlar bildirirlər ki, bu davranış çox vaxt yanlış şərh olunur və əslində tamamilə fərqli səbəblərlə bağlı ola bilər.

HİT.az xəbər verir ki, "The Pulse" nəşrinin yazdığına görə, insanların izdiham arasında yeriyərkən yerə baxması beynin təbii işləmə mexanizmlərindən qaynaqlana bilər və bu, heç də həmişə mənfi emosiyaların göstəricisi deyil.

Mütəxəssislərin sözlərinə görə, yerə baxan insan narahat və ya kədərli ola bilər. Ancaq o, eyni zamanda yorğun, dərin düşüncələrə dalmış, diqqətini cəmləmiş və ya sadəcə olaraq çox sayda tanımadığı insanla göz təması qurmaq istəməyən biri də ola bilər. Bəzi insanlar üçün aşağı baxmaq sadəcə daha rahat hiss etdikləri təbii davranışdır.

Psixoloqlar qeyd edirlər ki, üz ifadələrini oxumaq və ətrafdakı insanların mimikalarını davamlı izləmək beyindən əlavə enerji tələb edir. Hər kəs bunu etmək istəmir.

Yerə baxmaq tarazlığı qorumağa kömək edir

Məqalədə bildirilir ki, yeriyərkən ayaqların altına baxmaq bədənə tarazlığı saxlamağa və hərəkətləri daha dəqiq planlaşdırmağa kömək edir. Beyin ayağın növbəti addımı hara atacağını əvvəlcədən müəyyən etmək üçün yol səthindən aldığı vizual məlumatlardan istifadə edir.

Xüsusilə nahamar səthdə və ya izdihamlı mühitdə aşağı baxmaq beynin avtomatik şəkildə tarazlığı qorumaq üçün həyata keçirdiyi normal prosesdir.

Bundan başqa, insan intensiv düşünərkən də baxışlarını aşağı yönəldə bilər. Çünki beynin diqqət resursları məhduddur və ətrafdakı çoxsaylı üzləri, mimikaları emal etmək əlavə zehni yük yaradır. Buna görə də diqqəti daxili düşüncələrə yönəltmək üçün baxışların aşağı salınması təbii reaksiyadır.

Depressiya zamanı yeriş də dəyişə bilər

Mütəxəssislər vurğulayırlar ki, depressiya və ya uzunmüddətli emosional gərginlik zamanı insanın yerişi də dəyişə bilər. Araşdırmalar göstərir ki, belə insanlar daha yavaş yeriyir, qollarını daha az hərəkət etdirir, bədənlərini önə əyir, çiyinlərini aşağı salır və baxışlarını yerə yönəldirlər.

Lakin alimlər xəbərdarlıq edirlər ki, təkcə aşağı baxmaq əsasında insanın psixoloji vəziyyəti barədə nəticə çıxarmaq olmaz. Bu davranış yalnız digər əlamətlərlə – uzunmüddətli stress, özünəqapanma və ya digər davranış dəyişiklikləri ilə birlikdə qiymətləndirildikdə müəyyən məna daşıya bilər.

Araşdırmalar həmçinin göstərib ki, bədən yalnız emosiyaları əks etdirmir, həm də onlara təsir göstərir. Təcrübələr zamanı "kədərli" yerişlə hərəkət edən iştirakçılar daha çox mənfi sözləri xatırlayıblar, "şən" yerişlə hərəkət edənlər isə daha çox müsbət sözləri yada salıblar.

Alimlər hesab edirlər ki, bədən və beyin arasında qarşılıqlı əlaqə mövcuddur və hərəkət tərzi insanın düşüncələrinə və emosiyalarına müəyyən dərəcədə təsir göstərə bilər. Bununla belə, yerə baxaraq yerimək təkbaşına kədərin və ya depressiyanın göstəricisi hesab edilə bilməz.

Samir