Ev iti saxlayanların əksəriyyəti ən azı bir dəfə ev heyvanının səbəbsiz yerə uzun müddət hürdüyü vəziyyətlə üzləşib. Bu hal xüsusilə küçüklərdə və bəzi kiçik cinslərdə daha tez-tez müşahidə olunur. 

HİT.az xəbər verir ki, "The Washington Post"un mütəxəssisləri bildirirlər ki, problemi həll etməzdən əvvəl itin niyə hürdüyünü müəyyənləşdirmək vacibdir.

Baytarların sözlərinə görə, davamlı hürmə it sahiblərinin ən çox müraciət etdiyi davranış problemlərindən biridir. Bu məqsədlə müxtəlif "anti-hürmə" yaxalıqları və digər cihazlardan istifadə edilsə də, mütəxəssislər belə üsulları tövsiyə etmirlər. Onların fikrincə, ilk növbədə davranışın səbəbi araşdırılmalıdır.

İtin hürməsinin tezliyi qismən cinsindən asılıdır. "Chihuahua", "Taksa", müxtəlif teryer cinsləri və "Kavaler Kinq Çarlz Spaniel" kimi kiçik itlər adətən daha çox hürür. Mühafizə məqsədilə yetişdirilmiş cinslər üçün isə yüksək səslə hürmək təbii davranış hesab olunur. Bununla belə, eyni cinsə aid iki itin davranışı da fərqli ola bilər.

Mütəxəssislərin sözlərinə görə, itlər qorxu, darıxmaq, tənhalıq, artıq enerji, bayıra çıxmaq istəyi, yad insanların görünməsi, digər itlərin hürməsi və ya sahibinin diqqətini cəlb etmək üçün hürə bilərlər.

Hürmənin tonu da müəyyən ipucları verir:

* alçaq tonlu və nəriltini xatırladan hürmə adətən itin ehtiyatlı və ya narahat olduğunu göstərir;
* yüksək tonlu və tez-tez təkrarlanan hürmə isə həyəcan və ya oynamaq istəyindən xəbər verə bilər.

Baytarlar problemi azaltmaq üçün əvvəlcə səbəbi aradan qaldırmağı məsləhət görürlər:

* it darıxırsa, onunla daha çox gəzintiyə çıxın və oyuncaqlarla məşğul olmasına şərait yaradın;
* pəncərədən keçən insanlara reaksiya verirsə, pərdələri bağlayaraq görüntünü məhdudlaşdırın;
* küçə səsləri narahat edirsə, sakit musiqi kömək edə bilər;
* bayıra çıxmaq istədiyini hürməklə bildirirsə, onu qapıya asılmış zəngdən istifadə etməyə öyrətmək mümkündür.

Mütəxəssislər hər hürməyə dərhal reaksiya verməməyi də tövsiyə edirlər. Əgər it başa düşərsə ki, hürməklə sahibinin diqqətini cəlb edə bilir, bu davranışı daha tez-tez təkrarlaya bilər. Lakin hürmənin səbəbi qorxu və ya təşvişdirsə, heyvanı tamamilə görməzlikdən gəlmək də vəziyyəti ağırlaşdıra bilər.

Həmçinin vibrasiya və ya ultrasəs əsasında işləyən "anti-hürmə" cihazlarından istifadə tövsiyə edilmir. Baytarların fikrincə, bu vasitələr itin stressini artıra bilər və davranışın əsas səbəbini aradan qaldırmır.

Mütəxəssislər vurğulayırlar ki, davamlı hürən iti susdurmağa çalışmaq əvəzinə, əvvəlcə onun bu davranışının səbəbini müəyyən etmək və problemi məhz həmin səbəbdən həll etmək daha düzgün yanaşmadır.

Samir